西灣河嘉亨灣，名人買家特別多，除咗老牌投資者，年輕一輩都有捧場客，樂隊Shine成員黃又南，噚日凌晨時分買咗間。
美聯曾志光話，又南買入六座三十樓以上G室，六百七呎，逾三百八萬，每呎五千七。又南話未諗掂自住定投資。不過，佢用建築期付款，睇怕都係投資居多。又南𠵱家先至話二十歲出頭，舊年有七位數字收入，真係錢途無限。
另外，恒基噚日揀灣仔君悅酒店，做嘉亨灣第二輪內購，而喺等候區，亦好細心準備好多美食招待準買家。賣樓流程雖然比第一次快好多，買家都有時候享用美點。恒基話有鮑魚款待，不過蘭西無緣享用，因為鮑魚受歡迎，做咗快閃黨。
香港公司北上拓商機已成為大趨勢，唔少重將本港模式引入內地，好似新昌管理，佢哋攞到瑞安上海瑞虹新城二期管理合約，樓盤交樓時，安排交樓大使喺大堂接待，陪同辦理有關手續，同齊齊去驗收單位，即時解答業主問題。
據聞，部份本港物業管理公司，管理嘅內地住宅，都有提供類似服務。
新昌管理喺內地嘅管理業務，𠵱家主要集中喺上海同北京。
將軍澳廣場商場五月份開張以來，南豐搞咗唔少宣傳活動，最近一個就係CoolIdol新SING歌唱大賽，從一千個參賽者中選出十二個，參加噚日舉行嘅總決賽，當中包括來自日本嘅小朋友，而擔任評判嘅，有平日甚少露面嘅南豐發展董事司徒啟瑞。
南豐發展地產部副經理鍾美燕話，製作費用咗過百萬，目的係想吸引年輕人前往消費，配合商場年輕化嘅定位。
將軍澳廣場商場出租率已有七成，時裝、精品同埋玩具舖較多，一般呎租由二十一元，到最貴一百二十幾都有。遲吓會搞有關玩具同小朋友嘅比賽，總之將商場人流搞到有咁旺得咁旺。
聽坊間講，有啲代理向買賣雙方壓價，要求加佣。手法值得商榷。
佢哋首先盡量壓低業主叫價，同時推高買家出價，一旦買家肯出高過業主底價，代理就向買家游說，話若能以低於叫價成交，要求買家畀多啲佣，買家見有着數梗應承啦。相反，就用同一手法向業主埋手。
另一種手法係，一啲細行代理登咗放盤廣告後，有同行致電要求合作，揚言有客在手，但指單位銀碼細，要求業主畀多個佣，業主應承，最後有客就掂；但若冇客，最後同行就冇咗影。
啱啱交樓嘅君頤峰，收樓程序有唔少心思，富城集團負責收樓服務，搞咗「君頤峰超豪業主收樓日」，同埋「仲夏盛滿太陽花開心派對」，以嘉年華會形式，由發展商派出親善大使，向業主講解收樓手續。
另外，富城搵咗部勞斯萊斯，接載君頤峰業主出入收樓處，寓意日後會為物業提供一系列禮賓級酒店式家居管理服務。
不過，聽講收樓期間，好多買家都係坐自己部勞斯萊斯到場，認真富貴。
蘭西
電郵地址：
