由於細價股持續冇表現，小初同一啲老友呢排專注發掘中型股，尤其係即將公布業績的優質股，博坐到順風車。
經紀黃今日嘅心水選擇，就係將在本月27日公布中期業績的魏橋紡織（2698），佢話大行睇好魏橋業務增長，舊年困擾多時的棉花價格持續回落，所以睇好魏橋前景。
魏橋喺5月底，以每股11.60元配股集資，其後股價低迷好一段日子，甚至曾經跌破配股價，不過最近幾個星期，魏橋股價顯著回升，反映沽壓已經消化。
經紀黃話，魏橋早排見過13元的近期高位，然後大摩在上周出報告力讚，重將目標價調升至15元樓上，豈料股價即刻大跌，似乎係有大戶玩嘢，但好快就見到魏橋保母百記出嚟力頂，上周五升1.7%，收12元，成交金額1142萬元。
另外，經紀陳曾經提過嘅奇股南海石油（076），近期股價持續高企，上周五收3.45元，升0.73%。近日隻股成交金額每日都保持在1000萬元樓上，在淡市中特別矚目。經紀陳話，近期有關南海石油的傳聞都離不開集資兩個字。
慕容小初