上周會考放榜，八方幾個老友嘅仔女都考得好好成績，真係可喜可賀，其中兩位係行家之子，一個《星島》主筆林志明，佢同八方係舊同事兼老街坊，林兄中英文都了得，兩夫婦對孩子照顧有加，細細個已經培養佢閱讀興趣，出10A狀元實在有因。
至於廣播處處長朱培慶夫婦，兩人都係上班一族，八方從來冇聽過朱太話要迫孩子讀書，朱天棟今次取得5A2B3C，朱爸爸認為係正常加好彩，因為天棟喺校內文科班考第一，平時成績唔錯，考試前夕，父子曾交換心得，天棟覺得既然冇法做十項全能，不如專攻幾科，結果果然英文、地理、經濟、會計以及自修既普通話攞晒火箭A，而數學就有啲唔小心同歷史一齊B咗，中文中史以及宗教相對投放時間少，攞C屬合理。個仔有咁佳成績，朱培慶（圖）當然高興，佢同朱太都話個仔係記性好，但係唔係死讀書或者好緊張嗰種。
朱天棟目前仍在日本交流，佢知道可以同好同學湯煒軒（湯家驊之子）一齊繼續原校讀中六一定好開心。
至於八方一位不幸因病去世嘅中學女同學，佢嘅女兒能文能武，會考攞9優真唔簡單，喺政府做高官嘅劉爸爸肯定功勞最大。
傳真︰2623-9278
電郵︰