上市公司開股東會，係小股東同公司管理層一年一度最近距離嘅接觸機會，唔少大公司都特登喺大酒店開會，兼備豐富午宴，答謝小股東支持。查家嘅香港興業今日舉行股東會，地點揀咗喺公司嘅招牌樓盤──大嶼山海澄湖畔嘅住客會所。
海澄湖畔個住客會所臨海建設，風和日麗去大嶼山行吓都係一件賞心樂事，兼且可以睇吓自己公司嘅「產品」，問題係股東會朝早十點開始，小股東要赴會，一係就喺中環搭小輪，預番二十五分鐘船程，即係最遲要搭九點二十分班船，每位船費二十七蚊；一係就喺東涌搭巴士，每位八蚊，車程十分鐘，最遲要搭九點半班車。
翻查歷史，興業過往都喺中環開股東會，九七、九八年喺交易廣場嘅美國會，之後喺富麗華酒店，後來富麗華摺咗，就改喺港麗同文華，今年去到大嶼山咁遠，唔知有乜啟示。
傳真︰2623-9278
電郵︰