星期日嘅旺角行人專用區好多嘢睇，除咗琳瑯滿目嘅舖頭同攤檔之外，重不時有年輕人嘅搞作，不知幾有活力。噚日就有一班中學生喺度派豆，一杯杯咁，好盞鬼。盂蘭節就到，點解唔係派米？負責派豆嘅中學生伍袁雋話，呢壇嘢叫做綠豆行動，將啲綠豆放入杯裏面，鋪上棉花，好快就會茁壯成長，象徵民主力量喺香港不斷壯大。八方都記得，小學老師上自然課教過我哋種綠豆。伍袁雋話，參與民主同種綠豆一樣，唔需要等長大成人先至做，好似立法會選舉咁，雖然十八歲先有資格投票，但係年輕人一樣可以參與，就係到咗九月十二號提醒爸爸媽媽投票。各位年輕小讀者，收到未？
傳真︰2623-9278
電郵︰