美股上周五晚守得穩，冇再跌，但油價繼續上，情況唔係幾好，大市都係偏淡居多。
恒指P輪：博個市向下，買恒指P輪，可以揀9777，下月尾到期，輪價13.1仙，溢價2.6%，槓桿率21.9倍（有效14倍），引伸波幅21%。稍為遠期嘅則揀9087，輪價19.6仙，溢價5.2%，槓桿率11.5倍（有效6.7倍），引伸波幅25%。9777槓桿率大好多，對恒指變化會比較敏感。到期之前，滙控（005）、恒生（011）與若干藍籌除息，會拖低恒指少少，隻輪實際溢價低過表面數字少少。
恒指C輪：個市若跌得太多，或油價忽然大跌，博個市反彈，低位買恒指C輪，可揀9773或9082，9773下月尾夠鐘，輪價8.8仙，溢價1.0%，槓桿率25.5倍（有效16.2倍），引伸波幅20%。9082長期啲，年底到期，輪價17.4仙，溢價3.4%，槓桿率15.8倍（有效9.2倍），引伸波幅22%。
中企P輪：國企股壓力仍在，吼住升多少之時，趁低（P輪跌）買些少中企P輪，對象係9972，10月尾夠鐘，輪價11.1仙，溢價6.9%，槓桿率15.1倍（有效7.1倍），引伸波幅36%。亦可諗吓9057。中企P輪溢價唔算吸引，炒作只宜非常短線。
中企C輪：國企股若跌得太多，則博反彈，買9984，喺11月尾到期，輪價12.6仙，溢價3.1%，槓桿率7.5倍（有效5.5倍），引伸波幅36%。亦可諗吓2185，呢隻長命啲，溢價高啲，槓桿率低啲，對國企指數變化敏感度細過9984。
章盛