列斯降落英冠似乎重未擺脫「黑氣」，日前聯賽對住狼隊雖然劣勢之下唔使輸波，但就賠上兩個中堅，一個重傷至可能被迫退休，一個領紅牌出場，面臨停賽。
列斯上周六訪狼隊開賽十八分鐘，就有拉迪比斷韌帶離場，領隊布歷維賽後講佢傷勢時認真唔樂觀，今季唔使重返球場，而佢同列斯只有一年合約，好可能要提早掛靴。
重有，杜比利完場前五分鐘，禁區內職業犯規，結果攞紅牌之餘，隨時要停賽兩至三場，列斯喺一場比賽冇咗兩個中堅，都咪話唔傷。
唯一安慰係老門將蘇利雲今場救咗個十二碼，幫球隊搶到一分，布歷維賽後大讚蘇利雲賽前門將教練勤睇錄影帶，研究狼隊十二碼，果然奏效。怕且列斯嚟緊靠晒呢位門神！
維拉揭幕戰就順利贏波，入波功臣都係兩名前鋒C高爾同華素爾。不過，領隊奧拉利賽後依然好希望羅致比亞堤，加埋柯碧克交換，補充兵源。我求大俠認為，維拉今季借到C高爾，加埋養緊傷嘅安祖，都已經夠用，有無必要用八百萬鎊買前鋒？奧拉利真係唔使錢、唔安樂。
上周六英超聯開鑼，八場比賽竟然有六場係和波收場，都算係近幾季罕見。我求大俠有睇直播賽事，形勢係主場嗰隊先落後才追上，亦因為第一場關係，唔少球員到比賽後段莫氣；似乎同球隊因為歐洲國家盃決賽周，備戰不足有關，怕且季初頭兩、三輪比賽，出現大勝局面唔多。
巴塞隆拿早排買埋伊圖，前鋒線真係好多人，沙維奧拿想繼續留隊唔易；但係「兔子」爆料，話巴塞原來重欠佢一筆錢，如果要佢走，巴塞一定要還債。其實，以沙維奧拿喺美洲盃同奧運有表現，巴塞應留佢喺陣中，起碼有狀態應付季初比賽，唔使等拿臣、伊圖谷起狀態。
球迷都知今季英超聯由有線負責製作同直播，有波友睇完日前直播節目之後，喺網上留言板講啲評述員服裝，好似以前ESPN時啲節目主持人，西裝筆挺，大讚呢個專業形象㖭。話時話，我求大俠睇完歐洲國家盃到美洲國家盃電視直播，都係今次英超呢個專業LOOK至省鏡嘞！