本欄八月九日講「斬破樓蘭」，引述賓架T話劉蘭、樓蘭同音，劉蘭之名唔多吉利。估唔到即刻俾人鬧。首先李純恩來電：「喂，劉、樓廣東話同音，普通話不同音，你個老友賓架T搞錯咗喎。」跟住就收咗六七封電郵，嘲笑左丁山與賓架T劉樓不分，係「廣東沙文主義」。
劉、樓廣東話讀Lauh，普通話呢，劉讀Liu，樓讀Lou，當然係唔同音啦，所以讀者話北方人叫劉蘭，唔會諗到「不斬樓蘭誓不還」，南蠻粵音先會如此。
俾咁多人鬧，惟有申辯一下，我哋唔係要鄧永鏘vs古德明，而係話賓架T與左丁山都係廣東人，從廣東話角度取笑啫。有啲詞語，用廣東話讀毫無問題，上到上海賣廣告就杰撻撻，因為用上海話讀就似粗口，呢啲例子李純恩有好多。所以「劉蘭」喺北京、上海冇緊要，落到嚟香港就會產生聯想，呢樣嘢究竟是否「廣東沙文主義」，由得你自己諗。
廣東話係唔係南蠻之音，有排拗。國學湛深嘅陳耀南教授就認為廣東話夠古雅，用廣東話讀唐詩特別押韻；現代文學大家白先勇在嶺南大學講詩，用國語講，但朗誦唐詩之時，就改用廣東話！記得中學時代讀過羅香林教授一篇文章，佢話廣東話近似唐代語言，有九聲，所以作詩最好。反觀現代北方話（國語也好，普通話也好，當權者所講嘅語言，假如民國初立之時，決定以廣東話為國語，今日全中國都講廣東話）只有四聲，寫古詩反為韻律不合，唔信嘅話，大家可以問吓何文滙教授。左丁山唔係語言專家，在此寫稿只大家提供茶餘飯後話題，如果寫錯，請隨時鬧！