立法會選舉重有四個星期就舉行，各路兵馬喺重整陣容之後，開始埋身擊。鄭經翰最後加入戰團，不過佢就最老定，噚日重過區幫手叫咪，由九東去咗新西，之後又去番新東幫鄭家富手派傳單。
阿富同八方講，以前大班喺商台開咪，一放假就叫鄭家富頂住一陣，重笑佢係石九公鄭小班，唔好冒充深海大班講嘢。
咁呢個世界有借有還，鄭大班見新東選情緊張，亦主動拔咪相助，佢同阿富企喺人流至勁嘅上水火車站，大叫「大班小班齊開咪，議會繼續齊揚聲。」講真，做議員就阿富經驗多過大班好多，佢終於有機會教番大班轉頭。
大班出現，果然有吸引力，唔少人要同佢拍照留念，有位九東居民話自己從未投過票，今次一定投大班一票，大班聽到開心到不得了，點知佢重問多大班一句，點去登記做選民？即係未登記啦，搞到大班空歡喜一場。雖然呢位阿哥唔算數，但係阿富估計大班會帶嚟新票源，人人都話多啲人投票對民主派有利，希望係真㗎啦。
（圖）大班鄭經翰（左二）同小班鄭家富（右）現身上水火車站拉票，吸引唔少市民同佢哋握手。
司徒世華攝
傳真︰2623-9278
電郵︰