奧運開鑼，中國首先奪得四項金牌，兩項氣槍射擊，兩項係跳水！
中國人贏金牌，無論係邊個政權統治，都係一件好事。人人都想中國贏多啲，而有人就估，中國今次攞到金牌排名總數排第三，次於美俄兩國！
攞得個第三？冇面啲囉？因為中國全球人口最多，有成十三億，佔世界人口五分之一，按照選舉「比例代表制」，中國應該奪得全球最多金牌，名列第一先至啱！
人哋美國人口只得三億，佔人口二十分之一，美國擸得最多金牌，即是全球超強。中國攞全球第三，以人口比例計，其實都幾執輸。更何況奧運競技，啲項目分等級，最受人矚目嘅不外係田徑同游泳，燒槍同跆拳道嗰類，始終係外圍，雖然金牌數量冇變，份量始終爭咁少少！
不過唔怕，四年之後實有得翻身。二○○八年由北京主辦奧運，到時主人家大晒，可以增設奧運嘅舞獅（分南北獅兩項）、舞龍、打功夫（又分洪拳、詠春、蔡李佛等三項），同埋為咗慶祝香港回歸祖國，民政事務局局長何志平，係咪亦應該向中央請願，強烈要求中國奧委代香港出頭，將長洲嘅搶包山，亦列入奧運競技項目，到時在香港長洲舉行，咁到時中國（香港）奧運隊，又順理成章包辦多金銀銅頭三項嘞！
所以就算中國健兒今年表現差強人意，四年之後就一定會有運行嘞！二○○八年香港冇普選，不過奧運中國香港離島長洲隊，就一定會繼承李麗珊志願，攞多三個牌！到時就應聲摑咗小泉純一郎及石原慎太郎等日本軍國主義者一巴掌，等佢哋睇死我國冇權主辦奧運吖嗱！
傳真︰2623-9278
電郵︰