黃貫中（Paul）首次以個人名義自資推出唱片，他認為過去兩年香港人經歷了很多事情，有人會像鴕鳥般窩囊逃避，但他則希望透過音樂高聲疾呼，表達出自己對社會及人生的見解，他深信有不同的聲音，社會才會進步。
黃貫中身為唱作人先驅，除了對音樂有一份堅持外，還抱着敢言的態度，近日他推出首張自資唱片，便要取回音樂上的自主權！
過份自我審查
日前阿Paul在土瓜灣band房接受本報專訪，他說：「我同大部份唱片公司都合作過，但我希望有番音樂上嘅自主權，唔會俾一啲對音樂冇認識嘅人阻礙，正如呢張唱片係表達我對社會及個人人生嘅睇法，銷量如何對我唔重要，我只求有知音人。」
阿Paul的新碟足足籌備了兩年，他認為這兩年香港人實在經歷了太多事情，有人奉行鴕鳥政策窩囊逃避，但亦有人選擇高聲疾呼，阿Paul正是後者，他說：「係你哋唔敢言啫！其實每個人細個都好坦白，反而隨着年紀漸長，會睇時機去講一啲對自己有幫助嘅嘢。」
那麼曾否有人叫阿Paul少講為妙呢？他不諱言說：「以前啲唱片公司有，因為關乎利益衝突，香港人自我審查得好犀利，但呢個係我真實感覺，唔認同我冇問題，有唔同聲音同意見，社會先有進步。」
近年有歌手因藏毒而被起訴及判刑，玩音樂是否容易與毒品扯上關係呢？阿Paul說：「吸毒嘅人冇可能將音樂玩得好，唔好因為一、兩個例子而產生錯覺。」那麼阿Paul可有試過毒品呢？他說：「我冇試過，亦絕對唔宣揚，因為當一個人要靠毒品至可以做到另一樣嘢，我覺得好悲哀同折墮，自己要控制番自己嘅生命。」
替孔慶翔憂心
此外，提到近日風靡美國及香港的孔慶翔，阿Paul說：「見一大堆人當佢小丑咁開玩笑，我會唔開心，為中國人爭光？我絕對唔認同，好想問佢知唔知自己做乜嘢？唔通開演唱會時唱二十次《SheBangs》咩？我替佢憂心囉。」
眾所周知，阿Paul的女朋友是性感女神朱茵，兩人拍拖多年，感情如膠似漆，他自覺是一位稱職的男朋友，阿Paul說：「𠵱家會諗對方係會擔心自己，所以會每日打電話同佢講自己去咗邊，呢啲唔係叫報到，係叫有交帶。」
認真對待感情
阿Paul與朱茵感情穩定，他可有想過給女友一個名份呢？對此阿Paul笑說：「名份只係名份，自己父母都係離婚收場，我淨係保證到會認真對待呢份感情。」
阿Paul續說：「唔係話結婚唔重要，而係目前嘅音樂工作好忙，唔希望喺唔穩定嘅情況下倉卒結婚，我覺得結婚應該畀幾個月時間，好舒服，好歎咁結，名份已經有啦，如果我做咗啲越軌行為，大家都會幫佢狂插我啦。」
黃貫中曾修讀理工大學設計學系，並與荷李活著名電腦動畫《史力加》的動畫總監許誠毅份屬同門師兄弟，問阿Paul為何不親自操刀設計唱片封套，反而由著名figure創作人MichaelLau為他效勞呢？他說：「我怕自己太主觀，我唔想因為自己有盲點，而令整個創作太主觀。」
撰文：馮美茵
攝影：陳慧安
髮型：RoyFanfromHeadquarters
化妝：Haty&Jaffe
服裝提供：IT.izzue.com
