前晚保良局喺會展搞咗個「妙舞獻愛心2004舞會」，名人官紳都畀面出席，包括有前「一哥」曾蔭培，但係論焦點所在就係阿財爺唐英年媽咪唐尤淑圻，佢着咗件綠色舞衣，中場表演跳舞，問佢心情緊唔緊張，唐媽媽就好淡定咁話：「唔緊張，我跳開舞㗎嘛。」唐太嘅舞姿固然精采，十年如一日嘅纖瘦身形更加令人妬忌，唐媽媽話：「係呀，我幾好彩，食極都唔肥嘅。」真係羨慕死人。另外一個名太胡應湘太太胡郭秀萍心情就冇咁輕鬆，原來佢月底會以紅十字會助理總監身份去雲南探訪水災災民，佢重同八方呻冇錢，佢一臉憂心咁話：「都唔知點算好，以往都籌到幾百萬嘅，今年得幾萬蚊咋。」
而阿丁午壽就話下晝先至去完新界西拉票，佢重懶風趣咁講阿董太句名句「洗手洗手洗手」，佢話：「因為拉票時同過好多人握手，握手都有技巧㗎，要好有誠意咁握。」講到佢個孫女，丁午壽笑晒咁話：「改咗名啦，叫己尤，夾埋得九劃，罰抄都唔驚。」佢重爆以前做玩具生意時畀星球大戰公仔畀個仔丁天立玩，佢竟然唔吼，淨係鍾意玩椰菜娃娃。
（圖）唐英年媽咪唐尤淑圻（左）跳舞跳得淡定又有風範。
梁錦雯攝
傳真︰2623-9278
電郵︰