已經喺美國播完成半年嘅人氣電視劇《色慾都市》，雖然原本計劃拍嘅電影版胎死腹中，但係四位主角就唔憂冇嘢撈。好似喺劇中飾演大狀Miranda嘅仙菲亞妮遜（CynthiaNixon），啱啱又拍咗口腔用品OralB嘅廣告，據講佢今次嘅酬勞高到令佢笑到合唔埋口㖭！
仙菲亞為咗一洗喺劇中嘅剛強律師形象，特登喺新廣告入面以天生嘅金髮示人，感覺煥然一新，睇落重後生咗好多。仙菲亞喺廣告度不時依起棚牙大晒佢副潔白嘅牙齒，其間重自爆話由細到大都有潔癖，一日至少刷四次牙喎，真係hardsell到絕。
另外，喺《色》劇飾演Carrie嘅莎拉謝茜嘉柏嘉（SarahJessicaParker）同飾演Charlotte嘅姬絲頓戴維絲（KristinDavis），早前分別做咗便服品牌Gap同化妝品Mayebelline嘅代言人，而飾演蕩女Samantha嘅甘卡拉圖（KimCattrall），亦將會去英國演舞台劇。佢哋個個都有着落，我羅拉都戥佢哋開心。