劉德華昨日與義工到多次發生倫常慘案的天水圍，探訪面對困難的青少年及老人，並與三百位邨民玩遊戲兼大派禮物。華仔透露天水圍邨民需要關心多於物質援助，故他會送出四十張演唱會門票，以鼓勵邨民做義工。
劉德華早前從報章看到天水圍的倫常慘案新聞後，寫下新歌《聽話了》，他昨日在香港青年協會社工邵家臻的協助下，特別與義工到天水圍探訪，華仔亦聯絡贊助商送出綠茶及T恤，派發給區內生活遇上困難的青少年及老人家，又準備四十張演唱會入場券送給義工。
華仔昨日首先到天悅邨的香港青年協會中心，與三十五名青少年聚會，一位失業少女表示很想學琴，華仔聞言即表示若她能達成一件困難事，便會贊助她。提到教育問題，華仔說：「我贊成體罰，喺細路仔未懂性前係要打，因為你講佢哋都唔明白，咪要出此下策，痛咪知驚囉，懂性之後就可以講道理。其實我一路未ready結婚生仔，因為我重未識應該點教。」
華仔其後到老人中心探訪，並獲老人家贈送紙花作紀念，一位婆婆大叫說：「華仔，我係你鄉里，我住河塘㗎，我知你之前返鄉下買塊地㖭呀。」另一婆婆則笑說：「『五虎』開始我就睇你呀，你幾時拍劇呀？」華仔回應說：「你哋鍾意睇乜劇呀？我拍《江山美人》好唔好？」婆婆問他要江山還是美人，華仔笑說：「我梗係愛美人啦，我靚唔靚仔先？」惹得全場大笑。
華仔再到天水圍循道衛理中學與三百多位天水圍居民玩遊戲，並大送禮物，有學生在台上夾band唱華仔新歌，華仔更即席與他們合唱。
華仔表示知道天水圍有很多「第一」，包括單親綜援數字全港第一、虐待配偶及虐兒個案全港第一等，他希望下次再到天水圍時，變成有考生會考九A狀元第一，以及成為全港愛心屋邨冠軍等，華仔說：「我公司準備咗四十張演唱會飛，雖然唔係貴飛，都希望鼓勵大家多啲做義工，做得最多嘅咪請佢睇演唱會囉。」提到被婆婆大爆回鄉買地，華仔笑說：「我係新會人，之前喺鄉下買咗兩塊地，一塊起咗學校，一塊未知點用，睇我老竇想點囉。」
對於今次探訪，華仔表示收穫比付出更多，他說：「我二十幾年前住藍田，幾乎日日有人打交斬人，同天水圍有啲似，其實佢哋未必係要贈醫施藥或者捐啲乜，而係需要關心。」
採訪：蔡如玉
攝影：陳偉權
