後日係林嘉欣二十六歲生日，前晚佢喺灣仔一間麥當勞餐廳同五十幾位fans慶祝，經理人彭淑霞同黃柏高都有到場，重分別送生麵同金菠蘿形嘅生日蛋糕畀佢，但同嘉欣傳過緋聞嘅電影公司老闆王海峰就未見蹤影。記者問嘉欣佢男友有冇送生日禮物畀佢時，嘉欣即時𦧲晒脷咁話：「哎，男性朋友呀？冇呀！」
嘉欣話細個就想喺麥當勞開過生日會，公司一問佢想喺邊度開，嘉欣即答話麥當勞，佢話：「麥當勞只限畀十二歲以下小朋友開生日會，我初時都擔心唔畀我開㗎。近來個個朋友都想請我食飯，但係我怕肥，生日都係想喺屋企靜靜哋過，唔想再唱K！至於生日願望係身體健康，因為我貧血，成日手震。」嘉欣又話早年喺台灣事業低潮時，朋友送咗盒錄滿鼓勵說話嘅錄音帶畀佢做生日禮物，令佢好感動。
馮仁昭噚日接到電郵，話黎明即將推出嘅新碟嘅第二首派台歌《不可一世》有抄襲張智霖舊歌《祝君好》之嫌，其中《不》曲入面嘅歌詞「明知總不可一世在這床上擁抱到下世」同《祝》歌入面嘅「寧願沒擁抱共你可到老」意思極似。黎明唱片公司AMusic負責人王凱文噚日喺電話度話：「Leon首歌肯定冇抄人。」
霍家二公子霍啟山同章子怡再做封面，大家都估緊霍公子使唔使好似上次咁俾阿媽詐型，佢噚日一支公喺中環出現，一路行一路陰陰笑，春風滿面咁樣，對於章子怡俾周刊狂踩話發姣，佢都只係笑而不答，至於父母有冇再「畀意見」佢，佢就以一句「私事唔想講」嚟應付大家。
Shine噚日出席新城喺灣仔會展美食博覽搞嘅活動，原來兩個大男孩由細到大都未去過美食博覽，徐天佑話：「我阿媽今日都有嚟，我想陪佢，但佢話唔肯同我一齊行，我都唔知點解，不過我都想行吓，買啲健康食品同人參畀老竇補身，聽講話呢度有鮑魚試食，我都想試吓！」
言承旭日前喺台灣舉行簽唱會，佢之前又接受電台訪問，被問到同林志玲嘅緋聞係咪真，佢就答話如果話係，感覺會好奇怪，如果話唔係，又驚將來俾人影到相，重話自己同林志玲未來有無限種可能喎。而林志玲接受雜誌訪問時，就話大家係朋友，不過經常會通電話，似乎佢兩個真係有啲嘢喎。
羅慧娟噚日喺灣仔幫一間啤酒公司搞嘅宣傳活動做司儀，平時都有飲開啤酒嘅娟妹話：「我酒量麻麻，當飲到有酒意時就係最享受嘅時刻。」另外，娟妹啱啱去完美國拍無綫節目《天賜良源》，佢話：「最難忘係俾蜜蜂針，重睇住隻蜜蜂拔番支針出嚟，結果傷口痛咗兩日，痕咗十日。」
