新世界中國（917）最近兩個半星期忽然活躍，最近13個交易日，成交股數3727萬股，差不多係再對上50個交易日成交總和。新中獲名牌品題，一煲就熱。
新世界系呢輪當旺，繼阿媽新世界發展（017）獲多家名牌睇好，新中呢隻新世界系中國房地產旗艦，又獲名牌睇好。上月尾里昂發報告，實牙實齒目標價睇3.7元。
唔照里昂對新中重估後每股資產值12.46元計數，齋計新中04年中期（12月底止）每股資產值10.77元，新中現價資產折讓，講緊都高逾80%，呢次更獲名牌垂青，發睇好報告，話咁快就煲熱；而新中資產折讓咁大，未有耐炒過籠、煲燶粥。
又新中相對阿媽新世界，有個優勢，就係自成一國。即係話，新中既同屬純官體系，但又獨立於新世界信息（301），所以，就算新信息業績有任何風吹草動，唔關新中事，反而阿媽新世界，就直接受到影響。趁有大勢兼有大行睇實，見新中有回調，可以吸納，到星期五計數，新中分分鐘成逆市奇葩。
東方航空（670）上周五好硬淨，逆市升4仙。又講兩點，第一，呢輪油價起勢急升，周五晚美國期油每桶急升1美蚊，再創46.15美元歷史新高。油價急升，固然大大影響到東航成本，但最近睇報紙，話唔少散戶興高采烈參與期油好倉買賣，並非侮辱散戶智慧，但通常大家一窩蜂落場，多數係水尾之時，期油又有冇例外？
第二，東航亦有名牌護駕。美林上星期先發報告，話東航7月航運表現強勁，續睇好東航，維持「買入」建議，目標價2元。星期一開市，有淡友藉油價急升，狂質東航時，係吸納良機。
錢雋