剛推出嘅《WE8》銷量好就預咗㗎啦，不過點都估唔到出現Game界久未見嘅現象，就係引發排隊買Game潮喇。𠵱家市價由初出$420跌番到$390左右，都算合理抵玩價，故本周仍吸引到唔少人入市，繼續冧莊做阿一。相反同期推出嘅PS2行貨遊戲，風頭全都俾佢蓋過，好似兩大中文Game《天誅．紅》同《嗶波猴終極熱戰》，銷量始終爭幾班，希望隻《水着美女廣東麻雀》同《KOF》可以收復失地啦。
SEGA喺MegaDrive時代名作《SHINNINGFORCE》，今個星期喺GBA上復活，當年呢隻Game搞到唔少機迷飯都唔食，日日掛住煲機，由故事到系統都好出色，追開SLG嘅朋友值得一試，街價約$290。
剛完結嘅漫畫節，XBOX喺入面做咗個會場震撼價，買5隻遊戲就即送主機，出咗呢個Promotion之後，反應的確唔錯，不過就搞到好多Game舖叫苦連天，事關好多街客都同零售商講數，要求獲得同樣優惠。今次咁嘅殺雞取卵促銷法，真係玩死唔少有存貨嘅舖頭。其實部機咁送法真係得不償失，街客心目中覺得部機係免費送，就梗係唔會花錢買，而舖頭更因冇錢賺而減少存貨，最終都係影響番代理商啫。
文：打機鐵人