李麗珍遭髮型師男友JackyMa的妻子爆料，指三人一年來過着大被同眠的同居生活，事件更被雙方的小朋友目擊，又披露曾開迷幻派對。昨日JackyMa坦言最愛李麗珍，為了她即使放棄事業亦在所不惜，現正積極辦理離婚手續準備與李麗珍結婚。
李麗珍髮型師男友馬桂燦（JackyMa）的妻子李靜婷（Janet），在新一期《忽然１周》中爆料，自言過去一年與阿珍及JackyMa過着大被同眠的同居生活，她與JackyMa的兒子及阿珍的女兒都曾目睹三人同床，又直認經常開迷幻派對狂歡。直至今年四月，李靜婷才與一對兒女搬離三人同居的寶翠園，她表示JackyMa因有人服食藥物費用龐大，才決定把寶翠園寓所變賣，阿珍亦要將其寶翠園住所租出。
李靜婷透露自阿珍及JackyMa改租碧瑤灣一個千五呎單位雙宿雙棲後，三人常為錢起爭執。報道又指阿珍近日因結識了一名陳姓新歡，遂將JackyMa趕離碧瑤灣寓所，令他四處借宿。
荒廢事業皆因沙士
昨日下午約四時，身為Headquarters髮型屋第二大股東的JackyMa返回中環的髮廊，十五分鐘後他主動走出門外邀請記者入店內做訪問。
（下為訪問內容） 記：記者 J：JackyMa
Ｊ：對於周刊嘅報道我覺得好無奈，我係做藝術工作嘅，心目中呢個世界好美好，我同李小姐（李麗珍）係住同一層樓，大家好啱傾，初時傾工作上嘅嘢，後來互相鍾意咗對方，我唔介意雜誌點寫，點都有啲誇大，我同珍妹○二年開始做好朋友，我覺得自己好幸運，不論係老婆定係珍妹，都好鍾意同欣賞我， 我四十幾歲人，𠵱家同珍妹一齊感覺仍然好似初戀咁。
記：你係咪因為同阿珍拍拖而荒廢事業？
Ｊ：其實都唔關佢事嘅，舊年又有沙士，我又要陪老婆又要陪佢。寶翠園又有住客感染沙士，所以我被困咗十幾日，好多生意都顧唔到。我好多生意都預埋佢一份，我會搞間disco，我都有教過佢打碟。
直指珍妹有情緒病
記：係咪試過為陪阿珍而唔返工？
Ｊ：唔係，係公司冇咗我唔得啫！我同阿珍承諾過會日日返工嘅。
記：你𠵱家係咪同阿珍分咗手？
Ｊ：我哋係暫時分開咗，因為我想搞掂離婚啲嘢先同阿珍一齊，我今晚約咗律師單方面傾離婚啲嘢。我老婆同我講過：「我已經讓咗位，李小姐咁都拋棄你就好過份。」 我同阿珍嗌交一定有，希望佢唔好再為咁而煩惱，佢都知我點愛佢啦，連工都唔返就知啦！
記：即係為咗佢放棄事業都肯？
Ｊ：係呀！
記：你點解要搬去朋友度住，連阿珍屋企都返唔到？你哋分開，係咪因為錢銀問題？
Ｊ：絕非錢銀問題，平時阿珍都使唔少錢，佢唔介意做出錢嗰個，因為佢同父母住，所以我想搞清楚離婚，先至同佢一齊。
記：阿珍𠵱家有個姓陳嘅男友？
Ｊ：我知有呢個人，但呢個人唔係佢心目中嘅男人，你睇佢鍾意得我，就唔會鍾意呢啲啦！
記：你哋係咪如報道所講咁三人同床，又成日開迷幻party？
Ｊ：珍妹有病，需要人照顧佢，係情緒病，要睇醫生，但佢一向好清醒，乜嘢叫迷幻藥？ 迷幻藥分好多種，我因為搞party有嘗試過食，但唔係迷幻藥，係食醫人嗰啲，好似抑鬱症咁，我太太就有食安眠藥。
記：係咪沉迷藥物？
Ｊ：乜嘢叫沉迷藥物？佢兩個女人都係做嘢時做嘢，遊戲時遊戲，一定唔會沉迷。
為兒子減少三人行
記：當時你哋係咪三個大人兩個細路同住？
Ｊ：我嘅世界係美好嘅，我一心諗住同媽咪（指太太）離婚再同阿珍結婚，同埋榕榕（阿珍與前夫許愿的女兒）可以跟埋我，阿珍唔鍾意許生照顧佢。
記：你同太太重係咪朋友？
Ｊ：係朋友，為個仔啫！
記：報道話細路仔見過你哋三人同床，怕唔怕影響佢哋？
Ｊ：希望盡量冇影響佢哋啦，𠵱家已經盡量冇咁做。
記： 齊人之福係咪唔易享？
Ｊ： 多啲錢會易享啲！
記：你太太係咪好憎阿珍？
Ｊ：暫時睇係，可能兩個互相都好憎。
許下承諾白頭到老
記： 阿珍係咪你嘅最愛？
Ｊ： 可以咁講，我四十幾歲人，好希望可以同阿珍白頭到老，我哋有過承諾，重勾過手指尾，大家今後都唔需要再識男女朋友㗎嘞！ 阿珍今日睇完報道好唔開心，話「搞冧晒我嘅事業」。本來佢今日會搵我整頭髮，但睇完之後叫我唔好整，話搵過第二個同佢整，所以佢今日唔會嚟，我好唔舒服，成個禮拜冇見過佢。之前阿珍喺內地拍劇，我有上去二十幾日，有工作先返香港，大家好似細路仔咁好開心。
可能阿珍拍戲睇得劇本多，佢覺得人生好似拍戲，但係我覺得人生唔應該似睇戲，一套戲只得兩個鐘，我覺得應該視人生為兩個月或者兩年咁睇。
記：阿珍嘅美容院𠵱家點？
Ｊ：𠵱家已經轉晒畀家姐，問題係家姐發現好多客上嚟都唔收錢，應該係買咗coupon，但買啲錢又唔知去咗邊，所以𠵱家一切由家姐接手。阿珍唔識理財，淨係識搵錢，希望佢快啲忙完，大家一齊快啲開間酒吧啦！
此外，昨日大批記者聚集於阿珍碧瑤灣寓所樓下，她與JackyMa於今年三月遷入該處共賦同居，今年六月JackyMa仍居於上址，每周只有兩至三日會乘的士返髮型屋開工。
採訪、攝影：蔡丹、娛樂突發組
