美股又散過，日股跌270點，恒指只係唔見53點，算係硬淨。港股近排怪怪哋，炒輪要小心啲，落場注碼咪太狼。
中海油C輪9421：恒指成份股中，最醒神係中海油（883），拉高恒指6.7點，股價升幅1.4%，收3.625元。聯想（992）股價升幅2.2%，大過中海油，但市值細好多，對恒指影響冇咁大，只係拉高恒指1.2。
中海油C輪9421威猛，收18.1仙，升13%。隻輪表面數據唔錯，溢價0.7%，槓桿率10倍（有效8.6倍）。但要留意隻輪月底玩完，24日（下個再下個禮拜二）最後買賣，已成為末日輪。另外，中海油近期跑贏其他石油股，能否持續上衝有疑問。正股若然回落，C輪數據靚靚都係假，輪價一樣要跌。中海油C輪9870，11月初到期，比較實際，但𠵱家未到吸引地步，正股調整後再諗。
大唐C輪：大唐（991）再跌10仙，C輪9222由11仙散落4.1仙，大散63%，溢價6.7%，23日最後買賣，睇嚟要作廢，槓桿率大到會飛都冇意思。另1隻大唐C輪9360收74仙，散16%，溢價3.4%，槓桿率7.5倍（有效5.5倍），引伸波幅51%，數據比較實際，不過本月27日最後買賣，時間值會消失得好快，又係冇得諗。
利豐C輪：利豐（494）派半年成績表，市場唔收貨，跌5.7%，收9.90元。C輪3件，件件唔掂，就算正股有技術性反彈，啲輪都冇法子得益。9850、9559、9293，喺10月同11月到期，全部變廢紙機會好大。
章盛