自由黨黨魁田北俊嘅宣傳伎倆確有一手，噚日田少被邀請出席沙田新城巿廣場視聽博覽做嘉賓，扮劉姥姥憨吓憨吓咁暢遊新科技展銷攤位，滴晒汗話自己唔識用啲新產品，誠惶誠恐咁話乜𠵱家啲手機好似卡片咁薄，咁多功能嘅？
點知田少睇吓睇吓，就攞咗自己部手機出嚟，好熟手咁㩒咗幾個掣拎啲「新奇嘢」畀記者睇，大大聲話部電話嘅開機屏幕，係用咗自由黨黨徽，跟住重話自己唔識搞，係囡囡一手一腳幫佢搞掂，話咁易就吸引咗一眾攝記大佬猛咁影相，所以話，各位選舉候選人，想博見報好簡單啫，跟田少學吓嘢，唔使搞到好複雜㗎咋。
（圖）田少攞部手機出嚟晒吓個自由黨黨徽。
傳真︰2623-9278
電郵︰