近排熱賣嘅西灣河嘉亨灣，唔少名人入市，噚日連藝人林國斌，都加入買家行列，不過佢話係幫朋友買，斥資近八百萬，買咗兩間，同樣係六百七十五呎兩房細碼，分別係五座極高層F，同埋二座高層G，呎價五千九百幾。
林國斌話，佢朋友買嚟自住，重話原本想低調啲，不過發展商恒基可以畀優惠價錢，所以先至肯畀記者朋友影相。
恒基營業部助理總經理林達民承認，今次畀咗少少折扣，至於平幾多，就唔肯透露，只係話自己喺恒基做咗咁多年，若要買番集團嘅物業，都應該只得一個巴仙折扣。
另外，藝人李家聲，噚日都買咗五個兩房單位，分別位於第一及二座，呎價近六千。
林達民又話，三座中高層獲買家以呎價逾萬承接兩伙，創新高，面積逾三千呎，涉資三千二萬。嘉亨灣聽日第二輪內購，林達民滿意初步收票反應。
夏日炎炎，唔少家長都會趁暑假，帶小朋友去學游水。中記睇中家長需要，與信和合作，月底前透過中原買入將軍澳蔚藍灣畔嘅頭五名買家，送親子習泳班，總值成九萬，一家大細學識游水，到樓盤入伙時，就可以喺會所泳池一展所長。
為宣傳呢個優惠，中記噚日搵嚟南豐分行客戶經理鄭健沐嘅小朋友，粉墨登場，着齊全套泳衣裝備，做model推介。
信和賣樓話事人韓家輝重非常配合，雙手抱起小朋友，喺空中扮游水。原來游乾水都可以咁開心。
新地馬鞍山村二百間獨立屋發展大計，當年為咗過城規會，話要為公眾起康樂園林設施，以及訪客中心，方便旅遊行山人士，城規因而批准。點知相隔幾年，新地話，政府冇要求，申請取消呢啲設施。
城規會梗覺唔妥啦，因為由始至終，冇話要新地做啲乜，重要嘅係，當初新地承諾會做晒呢啲嘢，可以為公眾同嗰度嘅規劃帶來好處，城規會先至畀佢過關。𠵱家咁，城規會梗唔制，咪否決佢嘅申請。
富城管理嘅荔枝角美孚新邨、荃灣海濱花園、沙田第一城、北角海峰園及鰂魚涌柏蕙苑等五個屋苑，舉行舊書回收慈善義賣活動，收到逾兩萬本，賣出三成，籌集到三萬，捐畀香港世界宣明會「雲南迪慶兒童及教育改善項目」。
至於賣唔出嘅，都會捐埋畀宣明會處理。
蘭西
電郵地址：