到力寶中心食潮州菜，坐低冇耐，見到官太企喺大堂中間，與朋友傾偈，於是行過去打招呼，官太話：「啱嘞，順便介紹畀你識，呢位係L校長，K幼稚園就係L校長負責嘅。」哈，世界真係細得交關，K幼稚園就係左丁山犬兒嘅母校，佢早已畢業，從此冇返過學校咯，乜今日左丁山居然碰上校長？呢間K幼稚園位於九龍塘，與別不同之處，就係冇功課做，放學之時，學生唔准拿書本返屋企。在此讀書，幼童學習愉快，無憂無慮。
L校長話：「十八年來，我哋未曾改變教學宗旨，我哋要教學生一種學習態度，等佢哋自己喜歡追求學習，唔係被迫學習。我哋經常有校友返嚟探訪㗎，最近就有啲UCLA學生返到嚟幼稚園訪問，歡迎你位公子嚟學校搵我。」
今時今日，唔畀功課嘅幼稚園唔知重係唔係受歡迎呢？大記者曾經陪佢位同學帶個仔去九龍塘著名幼稚園面試，呢間幼稚園人人爭住讀，據講男畢業生入小喇沙，女畢業生入瑪利諾咁巴閉。大記者話：「老師問完幾條問題，話你哋答得好好，呢度有紅黃綠白四粒糖，你哋鍾意邊粒呢？我同學嘅仔答紅色，於是先生送佢一粒紅色糖。兩個星期後，收到通知——不予取錄。同學好失望，問番一齊為子女申請入學幾位朋友，只有一位入到呢間巴閉幼稚園。追查研究之下，入唔到嘅細路都好老實，都話我鍾意黃色、白色、紅色之類。入到嗰位精叻女就答：我四粒都鍾意，可唔可以畀晒我？你話其中有乜微言大義呢？」
左丁山答：「細路女大概鍾意玩大富翁，贏就攞晒，夠進取心也，但如果人人如此，學校內嘅學生咪經常爭崩頭？咁嘅氣氛，對細路好唔好呀？」大記者話：「話之你，總之要入名校。」