王家衞執導嘅電影《2046》拍咗成五年終於完成,噚日喺中環搞咗個宣傳活動,但唔知點解只係得梁朝偉單人匹馬撐場,其他演員好似王菲同章子怡都一律冇到,就連導演王家衞都冇去到。
《2046》將會喺下月二十九日於全球同步上映,偉仔於活動前重同片商一齊睇咗部戲嘅八分鐘片段㖭。偉仔話自己會係《2046》嘅主要宣傳人物,有記者暗示章子怡近來掛住拍拖比較忙,所以唔得閒宣傳,點知偉仔好醒目咁話:「你(記者)唔好帶我去錯誤角落。」
早前有報道話木村拓哉同張曼玉喺《2046》中嘅戲份唔多,稍後將會補戲,偉仔就否認:「唔會喇!只係傳言啫,套戲會同喺康城播嘅版本一樣。」偉仔又表示拍完《2046》身心疲累,佢話:「冇諗過要拍五年,拍呢套戲都搞到身心疲累,因為一件事未完,會放唔低,好似永遠都做唔完。」
另外,劉嘉玲喺個選舉度成為十大高齡未婚美女嘅第一位,問偉仔有冇覺得自己女朋友係靚女,佢話:「你話係咪係,我冇理由自己賣花讚花香,好肉酸嘛!」
台灣女星蕭薔噚日同影迷唱K歡度三十六歲生日,蕭薔話佢自十八歲開始,每年嘅願望都係搵到好歸宿,可惜都事與願違,白馬王子都重未出現,只好改變願望隨緣喎。另外佢又許咗個願希望家人平安,唱片大賣,同埋少啲緋聞喎。佢下午同影迷過完生日後,就話打算夜晚同屋企人食飯,之後再同朋友去飲嘢,真係節目多多。
郭富城噚日去商台受訪,為咗迎合奧運開幕,城城重專登着咗對奧運特別版波鞋去,城城透露遲啲會專注籌備演唱會,佢話:「我保證個演唱會一定會性感,呢種性感係由體內散發出來,總之係會有一個精采嘅演出。」對於報道話城城拍戲時突然排舞,嚇窒在場嘅吳彥祖,城城話:「我當時唔係排舞,只係拉筋。」
麥家琪同王薇噚日出席亞視《皇太子秘史》好書欣賞,因為麥家琪遲到令活動遲咗半個鐘開始,所以佢一到就同記者道歉,佢話自己得閒都會讀書,𠵱家重有意報讀課程㖭。麥家琪對讀書嘅心得好獨特,佢話:「有心機咪讀,冇心機就瞓囉。如果搵啱自己有興趣嘅書就最好,始終大個之後成個人嘅氣質同修養都唔同。」
黃宗澤早前喺北京拍攝《覆雨翻雲》,發生咗消夜被扑頭嘅事件,噚日佢喺將軍澳電視廣播城出現,佢話今日自己會再去北京,但就唔會再深夜出街。對於有報道指同劇演員都因為呢件事而同佢劃清界線,黃宗澤話:「係咩?唔覺喎,我受傷之後全劇演員都有問候我。」