浙江省農業廳噚日別出心裁，邀請城中名人喺香港君悅酒店品嘗當地十大名茶，作為推廣活動，不過就有「博大霧」宣傳之嫌，因為主辦單位喺採訪通知講明出席嘉賓好猛料，包括金庸、呂志和、潘宗光、陳永棋，吸引大批記者聞風而至，點知去到先發現上述人等均不見蹤影，八方猛問公關，金庸係咪會嚟，個個都推說唔係咁清楚。
最終金庸都係冇出現到，范徐麗泰就成為全場焦點，佢身為立法會選舉候選人，主辦單位好識做，介紹佢係以全國人大代表身份出席，否則噚日喺六星級酒店搞嘅名茶推廣，如果入晒范太選舉開支條數，真係唔得掂，單係范太飲嘅安吉白茶，聽講已經要千幾蚊一斤咁貴。
范太大談飲茶之道，佢話，細個飲綠茶，大咗結婚後轉飲紅茶，因為胃寒，怕綠茶削胃，但𠵱家又話綠茶可以抗癌，范太講講吓竟然搵自己身體嚟講笑，話唔知係咪因為大個咗冇飲綠茶，所以搞到生乳癌。佢又祝大家「天天飲茶，身體健康」，咁識講嘢，𠱁得在場嘅浙江省官員好開心。
噚日推介嘅十大名茶，包括港人最愛嘅西湖龍井，係國務院招待客商嘅國茶，優質品種售價高達每斤三千至五千元，真係唔講得笑。過阿董。曾蔭權話延長政制討論諮詢期一個月，唔知敢唔敢包埋陳太意見上呈北京？
（圖）范太（右二）噚日去六星級酒店出席活動，以全國人大代表身份出席，唔怕入佢立法會選舉開支條數。 曾顯華攝
傳真︰2623-9278
電郵︰