家庭式小器械屋企收身一樣見效

家庭式小器械屋企收身一樣見效

係人都知做運動減肥最有效，但這亦是耐力的高難度考驗。其實嚷着要減肥的女性，不少係手臂、肚腩、坐圍或大髀等局部位置肥胖，所以你真正需要的是針對性收身。運動器械針對不同部位而設計，唔想去健身中心玩，不妨試玩家庭式器械新產品，等你在家中一邊睇電視、睇書，一邊自在收身，比起跑步、游水更直接有效！
記者：梁珮瑜
攝影：林栢鈞、蔡鴻雯
模特兒：ElaineTang@StarzPeople
化妝：VivNg

收肚腩腰帶幫你做Sit-up
ChenYu的Sit-up腰腹健身帶係用微電刺激肌肉，令肌肉好似做緊器械運動咁，集中燃燒腰或腹部的脂肪及加強肌肉彈性。聲稱每日「電」20分鐘，相等於做200下Sit-up。其實戴上後無乜感覺，超級懶人可以一試。

■ChenYu腰腹健身帶$686/a

■健身帶有高或低的微電可選擇，而微電板就藏在腰封內。

纖體環收髀收臂
好有彈性韌力的纖體環，同樣以推合及展開原理，運動及收緊肌肉。而纖體環有不同玩法及多項收身用途，減手臂、大髀位、腹及腰部，每日5至10分鐘，一個圈就搞掂。

■纖體環有不同玩法，多功能收身，可減手臂、大髀、腹及腰部。

■大型纖體環$780/b

6合1騎馬仔收勻全身
美國E.Force的騎馬仔器械，比傳統的設計更全面、更多玩法，配合不同的手及腳擺放位置，可有6招變化，幫你針對性減不同部位。每星期至少3次，每次20分鐘，針對坐圍、肚腩、大髀、手臂等，收身收緊肌肉都無問題。

■6合1騎馬仔器械，睇電視最啱玩。$2,680/b

Step1
■騎馬仔其中一式LatPull，集中收Hip。手掌向下緊握扶手，腳掌踏上腳踏。

Step2
■手向自己拉，同時腿用力推至伸直，然後繼續重複1及2步驟。

彈弓夾結實大髀手臂
齋睇器械得意外形，好難估到點玩，其實佢係專為大髀及手臂而設的結實器。原理就好似加有彈弓的夾，只需用力拉開彈弓夾，利用一開一合動作，可收緊髀位或手臂的鬆弛肌肉。初時會好攰，但勝在隨時都做得，每次5至10分鐘，象髀與拜拜手好快消失。

■結實大髀手臂彈弓夾$398/b

■收緊手臂用法

■結實大髀用法

橡筋彈力器收腹快
原理有如站立彎身掂腳及企直的動作，而橡筋彈力器用橡筋連接腳踏及手柄，加強咗動作訓練，每做一下都更有效，每日每次10至20分鐘，收腰收肚腩好見效。

■橡筋彈力收腹器$398/b

■腳掌踏進腳踏及手持手柄，重複拉起及放下手柄，全程要緊握手柄、保持腰及雙腿伸直。

其他家庭式收身器



再用纖體產品事半功倍
在做器械運動或按摩前，搽定纖體產品，必能事半功倍，收身更快、更有效。

瘦下身搖擺機$980/b（連扭板）
早年流行的收身器，針對肥胖下身，新版可每分鐘搖擺300次，比舊款更快更有效。用法係仰卧地上，腳踭放上搖擺機，可配合扭扭板放在Hip下，然後開動便可。

按摩收身器$398/c
MethodeJeannePiaubert的Gym-toner按摩器，有6組凸粒滾動器，沖涼後用佢按摩要減部位或全身，有助改善微循環及收緊肌肉。

清涼抗脂噴霧$478/c
MethodeJeannePiaubert出品，針對全身脂肪細胞，銀杏、檸檬、薄荷植物甘油等成份就能刺激脂肪分解過程。

Z.BigattiBodySculpting塑身啫喱$1,300/d
含矜貴植物精華，可收緊鬆弛及加速收身，同時有護膚保濕功效。

器械收身效果明顯
不少女性有誤解，以為玩器械會練到肌肉發達，變成「大隻妙」。事實上，要配合強勁的器械訓練及補充大量蛋白質營養等，先至有機會練到一身肌肉。你可根據自己的肥胖程度及部位來選擇不同的器械，進行某一部位的集中收身，要瘦邊Part就邊Part，效果好明顯！



查詢：
（a）SaSa（25055023）
（b）JCLadies（31022718）
（c）MethodeJeannePiaubert（22347353）
（d）Z.Bigatti（29184808）