呢排投資者想炒業績搵食似乎唔容易，皆因近期好多間公司公布業績，與分析員估計有一段距離，例如長期被人睇淡的聯想集團（992）就因為公布業績靚到暈，令投資者喜出望外，股價應聲大升。
聯想業績咁掂，原因係電話手機賣得好，並將成為公司未來增長主要動力。至於TCL國際（1070）據講將在8月26日公布中期業績，估計表現亦唔弱。但過往兩年大力催谷嘅手機業務，傳聞表現好一般，最掂一項業務，反而係TCL一直以來嘅老本行電視機產銷業務。
經紀黃引述分析員嘅說話，TCL電視機生意好，只要睇吓佢嘅對手表現就知道，好似創維（751）同內地上市公司康佳，近年轉向生產高毛利率的新款電視機，銷量不知幾好。
雖然係咁，但因為TCL近年多動作，分拆TCL通訊以介紹形式上市，又同國際大隻佬合作，市場評論好壞都有，頗為參差，令TCL股價經常原地踏步。TCL收2.40元，冇起跌，成交金額2102萬元。
慕容小初