姊妹花組合2R的家姐黃婉君（Rosanne），自與陳冠希（Edison）相約看電影後，即時傳出緋聞。不過Rosanne日前接受訪問時，仍為Edison講盡好話，指外界只着重Edison的緋聞而忽略其工作表現，她更表示不排除與對方有發展可能。
新加坡姊妹花組合2R中的家姐黃婉君，早前因與𠝹女王陳冠希結伴睇戲而傳出緋聞，雖然Rosanne堅稱與Edison只曾約會過一次，事後亦沒再與他聯絡，但日前2R在尖沙嘴接受訪問時，Rosanne對於與Edison是否有發展機會一事，則顯得有所保留。
Rosanne說：「唔知道，次次有緋聞，啲人問個男仔會唔會有機會，我唔可以話完全冇，唔想話要阻止啲乜，都未識人哋就話唔鍾意咩？」Rosanne在言談間更不時為緋聞多多的Edison講好說話，她說：「Edison個人係點我唔知，我只係覺得有咁多雜誌寫佢嘅嘢，身為一個藝人都幾慘，佢出道咁耐，做咗咁多嘢，出過咁多張碟，啲人都唔會寫佢嘅事業，我係佢嘅話，我會好唔開心。」
談到自上次看戲後便沒有再見Edison時，Rosanne說：「如果我再見到佢都唔會尷尬，因為我冇嘢好驚。」
而身為妹妹的黃婉伶（Race）則表示對胞姊百分百支持與信任，她只擔心兩姊妹的緋聞會影響事業。Race說：「我係有少少擔心，我哋做嘅嘢好正派，驚俾人以為我哋成日掛住拍拖，將我哋界定係鍾意蒲嘅人。」
Rosanne笑言從沒限定自己應該在何時拍拖，不過遠在星洲的父親卻希望三年內可以抱孫，更因而向女兒催婚。Rosanne說：「爹哋𠵱家四十七歲，佢話想喺五十歲前做阿公，佢重話你兩姊妹成日留喺屋企唔得㗎，要多啲出去玩，得閒同人唱吓K，我同佢講唔得閒呀，其實都係睇緣份啦。」
採訪：朱倬誼 攝影：何國豪 化妝：RickyLau
髮型：TavinLiu（Hip@HairCulture）
場地：天與地中華料理
