新晉歌手林子瑄（KiKi）多年前在前輩許冠傑的提攜下踏足舞台，一直對娛樂圈充滿憧憬的她，去年在外國留學回港後，終決定正式進軍樂壇，更以林憶蓮為目標，在舞台上盡展所長。
早前曾與谷德昭傳過緋聞的林子瑄，於九九年參與音樂劇《仲夏夜狂想曲》首次踏足紅館舞台，之後便與娛樂圈結下不解之緣，當時只得十八歲的KiKi正在澳洲留學，在回港放假時，獲許冠傑賞識加入音樂劇的演出，而這次經歷也正是KiKi人生的轉捩點。
KiKi說：「阿Sam係第一個相信我係得嘅人，就連我自己都唔相信，雖然《仲夏夜狂想曲》演出時間得幾分鐘，但係對我嘅影響真係好大，得到阿Sam嘅鼓勵，我𠵱家好有信心，我一定要重返紅館舞台！」
剛剛在阿Sam演唱會中擔任了兩晚表演嘉賓，令KiKi興奮莫名，她說：「真係估都估唔到，我重記得有一日朝早有人打畀我，話阿Sam想搵我做演唱會嘉賓，我當時真係開心到成個彈起啊！」
擁有鬼妹仔性格的KiKi表示絕對有信心在娛樂圈站穩陣腳，被問到目標時，KiKi說：「我嘅目標首先係想人認識我係一個舞台上嘅表演者。」而KiKi自小已視林憶蓮是她的偶像，她說：「雖然冇接觸過，但係我覺得佢每次企喺台上面都有一種吸引力，有一種騷味，我希望我可以好似佢咁，呢個亦係我目標。」
而自十歲便遠赴外國留學的KiKi，雖然只得二十四歲，但比起與她同期出道的蔡卓妍、方力申來說，已覺是慢人一步，她笑說：「我覺得應該早啲入行，同我同期出道嘅人已經上咗軌道，但係當時屋企人要我讀完大學，有咗根基先可以入行，所以都有少少後悔㗎！」
採訪：羅慧敏
攝影：林德雄
髮型：KenQi
化粧：KarenChoi
服裝提供：ing
