江欣慈日前拍了一輯極具官能刺激的照片，要被膠布纏着手封着口，甚有SM感覺，她笑說不少朋友覺得她貼錢出唱片亦是另一種SM，但她自己卻十分享受。
江欣慈（Liz）第二隻自資唱片將會於九月推出，日前她為雜誌拍了相片，靈感來自她即將於九月推出的新專輯，拍攝當日足足用了半天時間，其中有一輯相片Liz要被膠布纏着手及封着口，甚有SM感覺。
Liz大歎自己出唱片難搞，她說：「今次我出唱片，除咗宣傳係滾石幫我做之外，製作全部係自己搞掂，預算係六位數字，講真𠵱家做唱片好難做，連國際公司都頭痕，所以我都預咗蝕，但係唔做嘅話，我又唔甘心，唔做永遠唔會知道結果，所以要盡力去做，完成自己嘅希望，希望聽眾會支持我啦。」
原來在不少人眼中，Liz這樣做法等同自我虐待，她說：「有好多朋友話，點解唔去拍吓廣告、拍吓戲舒舒服服咁搵錢，但係我又死硬頸，又享受呢個過程，都算係一種SM㗎！」
江欣慈新碟中大部份的歌詞都是她親自填寫，其中一隻歌《體味》，歌詞十分激烈，其中一句是：「IHateYou,IKillYou」，她說：「呢隻歌講精神分裂，我覺得自己係雙重性格嘅人，有時又精神分裂，一時開心、一時失落，情緒起伏好大，而香港人工作咁繁忙，我諗大家都會有共鳴。」
採訪：張止寒
圖片提供：ZIP
