《星島日報》打官司，贏咗廉記，新聞界自然高興。法官話廉記冇用盡所有方法就實行搜查報館，於理不合喎。其實成單「人身保護令」報道，《星島》做得最快、最好、最詳細，如果因此而受罰，法庭版記者就最唔抵，以後做記者使乜咁勤力，咁多線路呀，照駁料、照抄都可以過日辰啫，橫掂編輯都唔會識嘅！
保護消息來源，係記者嘅最大責任。美國法庭要求《時代》雜誌記者做證人，講述有關CIA特務身份被傳媒揭露事件，記者唔肯，可能會被控藐視法庭而入獄，法官亦判罰《時代》，每日一千美元，直至佢嘅夥計肯出庭作證為止。嚡，講新聞自由，保護消息來源，唔係抽象概念，而係實實在在，要坐監、要罰錢㗎。有志於讀新聞系、做記者嘅學生，請緊記。
寫寫吓稿，經紀C忽然來電，佢話呢幾日放緊假，得閒無事，走咗去法庭聽「騰達智能案」，一位廉署證人講得非常詳盡，故事內容引人入勝，佢自己做過經紀，已經見過唔少事例，亦都歎為觀止，學到好多嘢。但奇怪嘅係，佢睇唔到報紙嘅詳細報道，唔通財經版啲記者完全唔理？左丁山話畀佢聽，法庭消息由法庭版處理，財經版記者或者冇去聽審呢？經紀C唔抵得：「既然係咁，又唔見法庭版講騰達智能案？」
左丁山為之語塞，只能推論法庭版記者唔多明白財經故事，聽唔掂，點會寫吖？報紙應該派財經記者到法庭聽審至係。經紀C堅持話騰達智能案內情複雜，新聞報道可以教育股民，知所趨避，報紙唔應該忽視！唉，你估𠵱家重有文以載道咩，經紀C唔好咁天真啦！