正值上位搏殺嘅日本性感女星森下千里，平日忙於替日本雜誌拍攝靚靚寫真，搞到成日食無定時，早前重搞到腸胃炎㖭，真係陰功。
森下千里早前幫日本雜誌《bomb》拍攝寫真時，自爆前排日忙夜忙，加上食無定時，卒之搞到腸胃炎病鬼咗，之後乜都食唔落，成個人瘦晒，真係聽到班男fans鬼咁心痛。不過，雖然森下大病初愈，但我羅拉睇番佢為雜誌拍嘅寫真，身材重係咁fit，一啲都冇降cup噃。
森下話經過呢次大病之後，先發覺一個人住喺東京真係好鬼寂寞，加上見到佢朋友所養嘅愛犬芝娃娃鬼咁精靈，搞到佢好想買番隻狗仔養吓。但我羅拉擔心森下咁忙，分分鐘買咗隻狗仔都冇時間照顧，到時搞到周屋狗屎咁就頭痕嘞。
下月就生日嘅森下話雖然重未諗到點樣慶祝，但佢話好想去迪士尼樂園玩吓喎。睇唔出就嚟二十三歲嘅森下都重係咁童心未泯。