宣萱及陳錦鴻昨日在旺角拍攝無綫新劇《老婆大人》外景，由於正值中午時分，故此引來大批巿民圍觀。
宣萱昨日首日開工，已有五個多月未拍劇的她，前晚心情顯得十分緊張，宣萱說：「夜晚都瞓得唔好，不過今日人又好精神、好興奮。」
陳錦鴻在劇中飾演一名住家男人，要負責家務，包括湊仔及煮飯，對此他說：「我覺得湊仔真係好得人驚，而且會有好多問題要擔心。不過我都會生小朋友，我太太都好鍾意小朋友。」
陳錦鴻表示拍攝《老婆大人》最開心的地方，是可以與盧海鵬再次合作，他說：「我同鵬哥已經成十年冇合作過，以前一齊喺亞視時都有合作過，佢係我心目中最欣賞嘅前輩，佢做乜嘢角色都做得好好。」
採訪、攝影：王崇穎