章子怡早前俾人偷拍到喺LV周年派對上，同霍震霆個仔霍啟山熱舞，事隔兩個幾月，佢哋又俾《壹週刊》影到佢哋上星期喺中環蒲Dragon-i，之後喺停車場咀完又咀嘅相，章子怡重搣佢面珠，似乎佢哋嘅戀情已經明朗化。
章子怡前幾日去韓國宣傳電影《十面埋伏》，出席咗當地舉行嘅小型派對，睇嚟佢重未知俾人偷拍咗。章子怡喺漢城押鷗亭洞舉行嘅派對，同好多韓國藝人見面，曾喺《藍色生死戀》入面演小恩熙嘅韓國女星文根英，原來係章子怡嘅fans，文根英喺派對上對章子怡話：「我係你嘅忠實影迷，你所演出嘅作品，我幾乎都睇過晒，能夠喺呢度親眼見到你，我覺得好開心。」
章子怡就話：「我之前睇過你演出嘅《小新娘》MV，你對眼好大好明亮，個人亦好精靈。」之後，文根英賣口乖咁對章子怡話，要好似佢咁成為國際巨星，開心到暈嘅章子怡亦鼓勵佢話：「你一定能成為國際巨星㗎！」
李若彤噚日喺上海整陶瓷，重獲陶瓷老師大讚手勢唔錯，不過佢就好唔小心，搞到成身泥！李若彤近日接拍咗電影《青花》，重一人分飾三個角色㖭！據知電影公司之前選角時考慮過趙薇同朱茵，但最後都係覺得李若彤啱啲，所以就揀咗佢做呢個角色。
鄧健明噚日喺商台接受訪問，佢話原本下星期去澳洲幫容祖兒做演唱會嘅樂隊，但最近英皇通知佢同黃丹儀，改做演唱會表演嘉賓，鄧健明話：「英皇叫我代替阿Deep（吳浩康）做表演嘉賓。」佢之前幫過王菲做演唱會，問佢有冇見過李亞鵬去探班？佢話：「場地咁大，見唔到。」
陳展鵬噚日喺亞視參與《雅典奧運》拜神儀式，佢話今次主要係做乒乓球賽事嘅評述，佢話：「我讀中學嘅時候係香港代表隊，不過之後就冇再打，我𠵱家都有喺體育學院教小朋友打波，所以今次好開心可以幫呢個項目做評述。」
陳小春噚日喺商台接受訪問，提到有周刊話佢日前喺廣州登台演出前，忽然興起去蒲吧，但落到去嗰陣發現啲女仔好「豬扒」，結果好冇癮咁走人，小春噚日話：「做鴨咩，話我搵唔到食，不知所謂，寫嗰個先係『豬扒』」。
梁漢文前晚喺新城接受訪問，問佢會唔會同許志安慶祝生日？佢話：「有人會同佢搞㗎啦！」梁漢文話以前試過同安仔搞生日派對，成班人着到古古怪怪咁喺偏僻後巷行catwalk，好彩冇俾狗仔隊影到。梁漢文噚日出席港台活動嘅時候就話：「我哋去咗灣仔一間朋友開嘅bar慶祝，我都係坐咗一陣就走咗。」
