第一太平戴維斯替劉姓投資者，標售西半山豐樂閣地下A舖，約萬呎，現由惠康超級市場，以每月三十萬元租用，租期至07年，估值六千五百萬。
位於堅道九十九號嘅豐樂閣，屬於同區罕有基座設小型商場嘅豪宅。
該廈最特別之處，是八十年代紅歌星譚詠麟曾卜居，既然帶旺譚校長，照計風水應該不俗。譚校長雖然已經遷出該廈，側聞仍揸住幾個單位收租。
豐樂閣樓齡十八年，住宅單位約千六呎，每個市值約四五百萬，不過，最近幾個月都未聞成交。
利嘉閣報告，上個月舖位交投偏靜，大額買賣明顯萎縮，全月只得嗰三百三十三宗登記，較六月微增四點七巴仙，但總值就跌一成六，至近十七億，係舊年十月以嚟新低。
七月摸貨登記有十九宗，佔整體五點七巴仙，比五月高峯期嘅十四點一巴仙勁跌，可見炒賣熱潮已經過去。
睇番七月，最大銀碼一宗，係葵涌廣場三樓六及七號舖，值一億四千二百萬，重係全月唯一過億嘅登記。
中記一姐劉瑛琳，早前出咗本書《地產樓聲璣》，搞咗個慈善義賣，總共籌到近萬九，捐畀紅十字會甘迺迪中心，用嚟資助殘障人士嘅教育發展之用。
另外，中原精英會，喺下個禮拜二舉行「跨越彩虹」籌款競技比賽，籌得嘅善款，都係捐畀同一機構。
恒隆地產何文田君逸山才剛登場，執行董事吳士元話，另一邊廂，上海地產項目也有進展，要北上視察，港滬兩邊走至得。
吳董噚日話，徐滙區港滙廣場二期兩幢寫字樓，決定集中火力興建，會提前一年落成，明年中可以完工，而住宅部份，進度會減慢。
佢又透露，寫字樓部份已經開始招租，每呎十八至二十蚊，重有幾層，已經洽租至最後階段。
恒隆另一個位於上海靜安區，名店林立嘅恒隆廣場，吳士元話，二期會喺○六年中落成，共有八十幾萬呎。
屯門新屯門中心業主貴賣平買，套現協助兒子結婚。祥益盤嘉茵話，十座中層E，七百五十呎，放盤一日，即以一百三十五萬沽出，每呎千八，係近期新高。
佢沽出單位後，再用一百萬買番同屋苑九座中層D，六百二呎，每呎僅千六。一來一回，套番幾十萬，畀個仔籌備結婚之用。
盤嘉茵話，今個月以嚟，新屯門中心交投活躍，至今已有六宗成交，上個月全月，都係得八宗。原來多咗人查詢買樓收租，而屋苑嘅租金回報率有六厘以上。
蘭西
電郵地址：
