創科實業（669）獲分析員一致唱好，但公布業績前股價卻下跌，有啲古怪。創科噚日公布截至今年6月止中期業績，股東應佔溢利比舊年上升41.8%，有2.99億元，但就低於市場估計的增長50%賺3億元以上。股價回落之謎，終於真相大白。
小初只係唔明白，點解市場上會有咁多春江鴨，成日都先行一步？創科噚日再跌4%，收10.65元，成交股數264萬股，金額2863萬元。
另外，利福國際（1212）同樣在公布業績前，股價反覆下跌。今個星期，利福股價突然跌穿10元水平，噚日跌勢更急，一度低至9.25元，收市報9.60元，跌2%，成交金額2912萬元。
但經紀黃就話唔覺得有古怪，因為隻股走勢向來反覆無常，周不時會嚇投資者一跳，小初早前炒過一轉，應該記憶猶新。
經紀黃又話，雖然利福走勢反覆，但佢仍然對隻股抱有信心，公司受惠於香港零售市場興旺，加埋上海久光百貨提供不俗盈利，表現應唔會差。利福8月16日公布首次中期業績，估計唔會走樣。
慕容小初