思科系統發出令市場大失所望的業績指引，導致美股受壓，幸好杜指最後企穩，港股噚日亦先跌後升，收報12413，升70點，成交有114.6億元。
國企股亦回穩，其中青島啤酒（168）業績出乎意料地好，中期賺1.45億元人民幣，增長33%，美中不足是冇息派，但股價仍勁升7.5%，收7.20元。
聯想（992）被證券界冷落咗一段時間，噚日公布首季賺3.4億元，增長21%，吸引番唔少證券行注視，股價大幅彈升11%，收2.25元。花旗預期聯想最壞的時間已經過去，即時將聯想投資評級由「沽售」調高至「買入」。
聯想話晒都被譽為中國的IBM，但市值只得168億元，跟美國IBM市值逾萬億相比，實在差得太遠。聯想經過長期的調整，貨源已歸邊，如果呢個時候獲得外資垂青，上升動力將難以想像。
今日係黑色星期五，據聞可能係恒指服務公司公布季度檢討的時候，傳聞中芯國際（981）、駿威（203）同招商局國際（144）有可能晉身藍籌之列，而恒基發展（097）會德豐（020）與上實（363）就可能出局。不過，中芯上市不足半年，除非有特別安排及原因，否則好難入圍。
新地（016）不經不覺向70元水平進發，噚日成交大增至5.63億元，升1.8%，收69元。有傳聞芬佬除咗睇好地產股業績外，亦看好新地與長實（001）聯手取得奪西九龍文娛藝術區項目，日後估計有排賺。花旗則看好和黃（013），並將長實目標價調高至93元。
阿虎