恒指升番70點，喺159點高低波幅中，長實（001）同新地（016）高低波幅分別係1.25元與1.75元。長實C輪9227與新地C輪9391，係成交金額最大嘅藍籌C輪，僅次於指數輪。9227彈升12%，9391亦係。兩隻輪溢價低，槓桿率高，對相關正股嘅變化，反應好敏感，炒兩隻輪咪太心雄，高價要賣，低價要買。
恒指C輪9773：個市上上落落，要大升冇條件，要大跌亦冇條件。大市升追C輪可能蝕底，吼低位買嘢安全得多。若見恒指跌一二百點，趁低價買啲恒指C輪，博大市彈番上去。9773係主角，下月尾夠鐘，輪價9.8仙，溢價1%，槓桿率23倍（有效15倍），引伸波幅21%。滙恒本月除息，有幾隻藍籌下月除息，實際溢價高過表面數字少少，但並唔離譜。
除9773之外，9971亦可列為對象，呢件壽命長啲，溢價與槓桿率都高啲同大啲。
恒指P輪9777：大市若上升，恒指彈上一二百點，則趁低價買恒指Put輪，對象係9777。隻輪9月尾夠鐘，輪價12.3仙，溢價2.8%，槓桿率23.5倍（有效14.2倍），引伸波幅21%。
聯想C輪2107：聯想（992）彈升11%，Call輪9845升60%，收6.9仙，12月初到期，溢價36%，九成九隻輪到最後變成天津鴨梨，即係冇渣剩。2107收42仙，升40%，明年2月到期，溢價11%，槓桿率5.4倍（有效3.5倍），呢隻比較實際啲，但仍然嫌貴。炒聯想C輪不如直接炒正股。
章盛