球迷想再次看到施丹穿上法國國家隊戰衣，在球場獻技，相信只可以睇番昔日錄影帶，因為這位法國靈魂人物決定退出國際賽生涯。
施丹接受法國電視台Canal+獨家專訪，到香港時間周五凌晨，就會喺法國當地播出，但佢喺自己個人網站率先披露呢個消息。好多民意調查都希望呢位皇家馬德里中場踢埋○六年德國世界盃先至退休，所以佢最終決定，令好多法國球迷非常失望。
其實，早前歐國盃八強輸畀希臘，係施丹想退出國際賽導火線。我求大俠認為，佢退出國家隊決定係正確，始終法國黃金一代已經完結，需要注入新血同調整踢法，勉強再踢盞自己辛苦！
意大利及中國政府早前達成交流協議，安排國家足球隊喺中國友賽，賽期為十一月十七日。不過有關官員當時唔知呢日中國隊要踢世界盃外圍賽，所以場波要再押後兩天至十九日（周五）進行，同時將兩地二十一日嘅聯賽暫停一周㖭。咁費周章打亂聯賽賽程，呢場友賽都可算無謂囉。
國米前鋒阿祖安奴上個月喺秘魯踢美洲盃，已經冇得唞暑；上周其巴西祖家傳來父親辭世噩耗，啱啱返國米報到嘅佢，又要飛返去南美。前晚國米打歐冠盃外圍賽，一般相信呢位前鋒唔會掛帥，點知佢照樣趕返球會，重正選上陣兼入波，打和瑞士巴素利，真係要寫個服字畀佢！
我求大俠噚日爆過紐記球員眼疾單料，最新消息係連真拿斯及畢特都受到感染，加埋羅拔、基雲、保耶、奧拜恩等，真係夠砌成一隊波！周六作客對米杜士堡嘅聯賽，更添紐記輸波可能。隻菌咁勁，如果我係佢哋啱啱由熱刺簽入嘅新兵卡爾，一定喺倫敦住多幾日至北上歸隊。
前晚奧運女子足球賽，德國竟然大勝中國八比○！澳彩經過呢場德國淨勝五球或以上波膽派八十一倍嘅比賽之後，餘下德國女足賽事重會唔會開盤呢？我求大俠睇到班德國女足隊員腳頭、身形、體能、甚至樣貌，都同男足有得揮（比德國男足識入波），往後再有開盤都可以續捧場！