Twins、房祖名及陳柏霖前晚在台灣出席《千機變Ⅱ花都大戰》首映，Twins出現時令到全場fans起哄，並一窩蜂衝前爭相拍照及握手。其間蔡卓妍（阿Sa）踏上紅地氈時，竟有fans趁亂突施怪手胸襲阿Sa。
人氣組合Twins、房祖名及陳柏霖前晚齊集台北的信義華納威秀廣場，出席《千機變Ⅱ花都大戰》的首映禮。祖名母親林鳳嬌亦專程從香港趕到台灣撐愛兒。不過前晚在會場中最受歡迎的藝人，始終為Twins雙嬌，兩人出場時令近二百名fans一窩蜂起哄衝前，爭相包圍Twins拍照及握手。
當Twins踏上會場的紅地氈時，兩旁的fans馬上迫向蔡卓妍身前，場面相當混亂，其中有一名穿白衣的短髮男fans，竟在人叢中突然伸出怪手向阿Sa胸襲。阿Sa被博懵後即時回頭看了一眼，但她仍能保持鎮定，繼續裝作沒事的走完紅地氈。
也許是經過前晚被鹹豬手一役，昨日Twins在台灣機場出發返港時，面對大班歌迷送機的阿Sa，不僅穿上外套作保險，更下意識地把紙袋放在胸前。
對於在台灣被人拍胸非禮，阿Sa昨日回港後，在電話中猶有餘悸地對本報記者說：「我今日諗起都驚驚哋，嗰晚會場有條路，但啲人好迫，人多到行唔到。跟住我已經感覺到有人拍咗我個胸一吓，我一擰轉頭，個個都縮晒手，我都唔知係邊個，但我重要繼續向前行，但前面又有好多對手喺度喎，於是我就槓起對手同人握手，開番條路嚟行，同埋護胸囉。」
阿Sa對被博懵大感無奈，她說：「係驚㗎，但喺咁亂嘅情況下都控制唔到，下次惟有再小心啲啦。」
Twins的經理人霍汶希昨日亦透過電話回應說：「我哋會考慮以後逢喺一啲造成騷亂嘅藝人出席公開活動，好似Twins同霆鋒，都會安排兩至四名保安貼身保護。而且我哋會請多一個保母，專係照顧Twins。」
採訪、攝影：朱倬誼（香港）、黎寶蘋（台灣）
