應采兒今年廣告和片約不斷，豬籠入水，她日前在廣州為一影音品牌宣傳時透露，最大得益是母親，而當日應采兒的出現，就吸引了大批巿民圍觀，其中一名男影迷，更一度突破防線衝上台，幸保安及時阻止。
為影音品牌AKAI擔任代言人的應采兒，日前在廣州舉行記者會，吸引大批巿民圍觀，大會聘請數十位保安維持秩序。應采兒的內地fans以後生仔為主，當日就有一位只得十五、六歲的男影迷，一度突破防線，衝上台想摸應采兒，幸被保安及時阻止。
事後應采兒說：「當時都有啲驚，不過睇真啲佢咁細個，個樣都幾友善，應該都只係想同我握手啫，所以我都同佢揮手打個招呼。咁耐以嚟，我未試過出席公開場合被人博懵，平時出席活動，一定有保安喺現場。」
應采兒透露今次擔任代言人的酬勞多達七位數字，而現時還有一個護膚品廣告正在洽談之中，她透露入行以來以今年搵最多錢，她說：「今年可以話係我嘅收成期，叫做搵到啲錢，之前公司幫我推咗一套電視劇，因為遲啲要拍公司開嘅兩套電影。
「搵到錢最得益嘅當然係我阿媽啦，因為我送咗好多禮物同埋現金畀佢，我自己反而冇乜買大禮，不過我就最想買樓，希望可以快啲儲夠錢，喺香港買番層樓啦！」
