以前曾經話過絕對唔會進行收購合併嘅佐丹奴，較早前居然轉死性話唔介意收購或者被人收購，佢嘅總舵主、即集團主席劉國權（圖）噚日喺業績會上解釋，大家唔使咁敏感，佢𠵱家都係將佐丹奴變番「正常」啫！之前無咁諗，完全都係拜「狂人」黎智英（即係𠵱家壹傳媒集團老闆）所賜！
劉總舵主話，因為黎生嘅「自己顧自己」嘅作風，實在對佢有太大影響，足足要成十年先能完全擺脫黎生嘅處事方法，所以要搞到𠵱家先改收購合併嘅方針。佢重反問番八方，你老闆轉行做傳媒咁耐，又有冇做過收購合併呢！八方諗，係喎，真係又無喎！
另外，由於今年上半年業績靚靚，出名對員工慷慨嘅佐記，喺上半年，向全球中、低層員工派發咗花紅，其中香港約千多名員工，每人分別攞到約三千元嘅花紅！如果有朋友喺佐記做嘢，就快啲搵人請食飯啦！
傳真︰2623-9278
電郵︰