紐卡素揭幕戰作客米杜士堡嘅東北打吡大戰，𠵱家剩番兩日就開波，因為受隊中球員患眼疾影響，搞到備戰進度大受阻礙，最慘係英超聯賽會肯定唔改期。
紐卡素目前有羅拔、基雲、保耶、奧拜恩同格力眼部受到細菌感染，隊醫話可能會有更多球員感染。雖然「紐記」曾經向英超聯賽會要求改期，但就被否決；不過，「紐記」預備組兩場比賽，卻因為球員病情無好轉，最後取消，咁點解呢場英超聯又無得取消？
「紐記」剛剛簽咗熱刺後衞卡爾，總算補充兵源，但備戰工作咁混亂，就算足智彩同澳彩明、今開始接受英超投注，都係睇定啲，到星期六電視直播開波前先買都未遲！
英格蘭超級聯賽公布咗今季聯賽球證件衫會印有阿聯酋航空贊助商標誌，亦即係同車路士同一間贊助商；曼聯領隊費格遜就講笑話，揭幕戰對車路士隨時誤會對手有十二個球員。如果標誌真係一樣，球證又着番黑色衫，車路士作客着深藍色衫時，真係好易睇錯！
上個禮拜突然被波圖炒魷嘅迪尼利，話自己情緒好低落，要用一年時間「療傷」。佢教基爾禾時出晒名守時，波圖用遲到作為炒佢理由都幾難令人接受，其實係波圖方面唔認同佢嘅方針。據講因佢未過試用期，被炒後一毫子都無得賠，加埋佢近排又捲入假波案，難怪要唞一年囉。
阿仙奴及曼聯前鋒兵荒，前者已放走簡奴、韋托特及謝菲斯，艾利亞迪里亦喺社區盾傷埋，得番亨利、雷耶斯及伯金；曼聯重弊，進行疝氣手術嘅射手雲尼斯達羅最快十月至可以復出，沙夏及蘇斯查亦有傷，開季只得阿倫史密夫及科倫兩位正前鋒；難怪費格遜猛話再買多件前鋒啦！
重記唔記得網隊嘅莫寧？呢位「腎病」勇士最近就話有望「奇迹」復出；更指自己係名人堂級數，所以三十四歲都唔怕冇人要。講真，莫寧人工要成四千萬港元一年，又有「暗病」；上次復出打網隊，唔得之餘更加同隊友馬田不歡而散。今次又話要復出，重有冇球隊想要呀！