許冠傑前晚繼續喺紅館開騷，佢答應幫無綫聽晚直播嘅港姐競選做「審美總司令」，佢前晚特別邀請十八位港姐上台表演。
十八位港姐前晚着住短裙仔出場，佢哋圍咗嗰大圈，阿Sam就企喺中間，當阿Sam一邊唱歌，班港姐就一邊拍手和應。
阿Sam平時逢見靚女都咀唔停，但佢見到班港姐竟然停晒口，重話：「今晚真係爽，多謝關帝。」阿Sam又喺現場搞氣氛，要觀眾估吓邊個係冠軍，佢又話：「佢哋個個咁靚，又好銷魂。」
據知無綫聽晚會用視像形式畀阿Sam即場評審，該節目監製衞世輝噚日喺電話度話：「點樣安排重傾緊，唔排除會用視像畫面，阿Sam基本上都見過班港姐，對佢哋嘅評價都心中有數，不過阿Sam嘅評語只係個騷嘅噱頭，唔會影響港姐分數。」
此外，阿Sam前晚個騷就請到陳小春同Cookies做嘉賓，Cookies喺台上演出後，阿Sam又逐一吻謝四位成員。而小春同觀眾握手時，有保安唔小心跌低咗，好彩冇受傷。
黃秋生噚日為商台《18樓C座暑期兒童廣播劇訓練班》做評判，秋生睇到小朋友演講時可愛嘅表情，都忍唔住笑，當中唔少小朋友都有懶音，問到秋生覺唔覺得𠵱家唔少歌手或者演員都有懶音情況？秋生就話：「係呀，我覺得講嘢發音好重要，所以我對我個仔好嚴格。」秋生重話如果拍戲期間有演員發音唔正，都會糾正佢哋，好似陳冠希同蔡卓妍咁。
馬浚偉噚日喺尖沙嘴宣布簽咗北京星澤國際影視文化內地經理人合約，馬仔話下個月會返無綫拍劇，十一月就去美國登台，之後會返內地拍戲。新公司已經幫佢傾緊幾部電影，重會發展埋日本市場，不過佢唔識講日文，有朋友就建議佢識個日本女友，但馬仔就話唔係好有興趣同日本女仔拍拖。
梁洛施（Isabella）噚日接受新城電台訪問，佢話後日會去泰國拍攝電影《見鬼十》，到時除咗會帶備蚊怕水以防蚊患外，重會帶埋充足銀彈購買內衣，佢重話自己係打底王，唔介意自己去購買女性用品，因為呢啲事好平常。
蔣麗萍家翁陸邦同梁家輝岳父江從善早前先後逝世，佢哋嘅屋企人噚日分別喺世界殯儀館幫先人設靈。蔣麗萍家翁陸邦係粵語片時代嘅導演，同佢合作嘅曾江亦都好有心嚟鞠個躬。而家輝岳父個靈堂擺咗個「謝絕採訪」嘅牌，家輝亦都冇接受記者訪問。
