爆機狂迷：<br>《嗶波猴終極熱戰》刀劍冇眼大亂鬥

爆機狂迷：
《嗶波猴終極熱戰》刀劍冇眼大亂鬥

SCEH喺暑假一口氣推出5款PS2中文Game，繼《魚仔》及《天誅．紅》及《廣東麻雀》後，終於輪到《嗶波猴終極熱戰》登場。大亂鬥遊戲任天堂早已玩到出晒位，今次SCE要花更多心思，除咗關卡總數超過50個外，全3D加卡通式貼圖，令到畫面靚得嚟，人物動作亦好靈活，最重要係支援4人同時作戰，人多時開Party一流！

記者：許福合

呢隻《嗶波猴終極熱戰》除咗遊戲性高之外，畫面都有相當高水準，尤其每版Boss出場時，所配合播放嘅卡通風格CG，可以媲美動畫質素，不過要欣賞CG，就先努力通過頭幾關，因為Opening片段出奇地並非CG，反而用上真人扮馬騮拍攝，比較少見兼特別！
遊戲中登場角色設定都非常可愛，有發明家愛迪猴，也有膽小駕駛員猴姆羅、視劍如命嘅宮猴武藏，以及愛搞鬼嘅巫奇五人組等，各自都擁有獨特技能，於不同版圖會各自佔有優勢，例如宮猴武藏用劍較出色，格鬥戰就較為着數，不過筆者試玩後，發覺VS模式角色能力影響較大，單打時最終決定勝負關鍵，還是玩家嘅反應同操控是否熟練。

■全面中文化，遊戲規則唔使估估吓，最啱一家大細齊齊玩。

■每個版圖有4人對戰，應以領先者為首要攻擊目標。

超過50個關卡
遊戲內以超多版數同難度挑戰玩家嘅耐性同耐力，一共有3個唔同玩法模式：故事模式、VS模式同編輯自選模式，當玩故事模式時，一共有超過50個關卡之多，頭幾關難度較低，主要鬥快、擊倒對手、執得錢多就可以過關，而中段開始，還要達到遊戲嘅指定分數，否則取得第1名亦要肥佬，過版難度可謂倍增！
玩家取勝秘訣，除咗熟練各種戰技外，更重要係反應夠快，手眼配合良好，否則一擊不中，必定成為其他人嘅箭靶。另外，場內經常會出現各種道具，不過要小心使用，部份雖然可以提升攻擊力，但亦有道具會不分敵我，亂打一通，落雷同放炸彈就係其一，使用時要小心。

■Opening變成真人影片，幾趣致。

■角色設定趣怪，畫面出色，相當吸引人玩。

考驗玩家反應
基本玩法有8種，包括激光棒、飛天蜻蜓、強力彈弓、呼拉圈、遙控汽車、橡皮艇、潛水艇同坦克車，初期每關可使用一種技能，到中後期就可以混合使用。由於每版性質都唔同，由賽跑、格鬥、競速、對戰等都有，所以開戰前，設定好適合武器道具就至為重要，例如要不斷跳躍嘅版圖，就必定要配合飛天蜻蜓，而強力彈弓因為可以遠距離射擊，建議成為常用武器。不過部份道具操作實在有點難度，當中以飛天蜻蜓、橡皮艇、潛水艇同戰車最為麻煩，要用齊手掣上嘅2支Analog控桿，同時又要顧住攻擊對手，難度幾高，要花一番苦工去操練。