東方海外宣布中期業績，賺錢破紀錄。船務C出道時，替董生打工，現在自立門戶，雖不是大老闆，亦是一方之主，上市公司賺到笑，佢亦笑微微。我哋講到，香港盛產船王，但「行船」好似愈來愈少，唔多見年輕人做船員噃，點解呢？船務C話：「好多人，包括我在內，喜歡請印度人做船員，佢哋除咗做得之外，有一個好處，就係英文talk得，而且善於辯駁。你知啦，現在世界唔多太平，貨船去到歐洲美國，經常俾人搜查，麻煩事多到你唔信。印度船員好嘢呀，去到邊度都可以駁嘴，寫英文報告又快又長，識得講咗等於冇講。華籍船員就差好遠咯，碰到麻煩就扮啞巴，唔識講，你話一時出於誤會，俾對方海關扣查嘅話，點算好？」
印度人係好醒目嘅，中貿林話：「我哋華人都唔曳呀，世界上邊個國家地方冇華人做生意？」賓架P答：「印度人亦然，整個東非、中東地區，做小生意、貿易嘅，都係印度人，同我哋同胞有得比。紐約大街、倫敦大街，電器、電子產品嘅舖頭，係印度人世界。」
律師洪爆出一句：「華人印度人都叻，能夠適應環境，去到天腳底都有唐人餐館、印度人找換店，但全世界都有佢哋蹤迹，專賺大錢，視中國人、印度人如無物嘅，就係猶太人！最大嘅投資銀行，就掌握在猶太人手上！」此言甚是，中印賺小錢，猶太賺大錢，自古已然，老牌投資銀行羅富齊（Rothschild）就係猶太人嘅，呢家人嘅法國旁支借錢畀拿破崙橫掃歐洲，英國旁支就借錢畀英國人打敗拿破崙，三百年來屹立不倒，你話猶太人嘅生意智慧幾高呢！邊個唔認為猶太人係世界最叻嘅人種，請舉例說明之。