經常獲得外資證券行唱好的創科實業（669），今日公布中期業績。唔少分析員都覺得創科會繼續去年靚爆鏡的業績，盈利增長起碼超過五成，多過3億元。
但經紀黃心水清，指出創科股價近日走勢反其道而行，噚日在公布業績前夕，股價再跌2.6%，收11.10元，而且成交唔係細，有成218萬股，金額2438萬元，確係令人感到唔明白。
經紀黃話，傳聞原因有多個，其中一個原因係個別基金正在換緊馬，沽出創科所致。話說創科近年業績強勁，主要係受惠於美國市場，但家陣好多人都擔憂緊美國經濟，營業額超過八成來自美國的創科，自然被人睇淡。
創科喺6月曾發行可換股債券，據講集資目的是為在歐洲收購作準備，以減低對美國市場的依賴，所以創科今日公布業績後，斷估芬佬同分析員，都會追問管理層有關呢方面嘅進展。
另外，街貨乾得交關嘅玉皇朝（970），在股東會通過改名後，噚日大升9.5%，收0.405元。但經紀陳話，幕後炒手可能為公司改名贈吓興，並非真正開車。
慕容小初