港股玩反底遊戲，美股大升，港股卻成個石堅格。恒指由升80點變跌64點，收12343。早段高價搶C輪者，到尾市已經人仰馬翻。
長實C輪9227：長實（001）早段造61.25元之時，長實C輪9227見49仙，正股回落到60.25元，隻輪低收41.5仙。博正股守住6字，彈返上去，怡情小注買9227。
9227喺11月到期，溢價3.2%，槓桿率14.5倍（有效9.1倍），引伸波幅26%。隻輪相當跟貼正股，而正股上落四五個價位閒過立秋，有心理準備炒9227贏得快時輸得亦快。高價勿追，有低位則考慮上車。如果唔介意買賣冇咁容易嘅，則亦可諗吓9389，11月中到期，輪價57仙，溢價2.2%，槓桿率10.6倍（有效7.6倍），引伸波幅28%，數據都好靚。
中企P輪9972：中企P輪9972收11.4仙，大升24%，10月尾到期，溢價8%，槓桿率14.8倍（有效6.7倍），引伸波幅39%，短線表現跟住國企指數，但溢價嫌過高。
同類輪9955比較實際，昨日升11%，冇9972咁多。隻輪亦係10月尾夠鐘，輪價23.1仙，溢價2.9%，槓桿率6倍（有效4.5倍），引伸波幅39%，上落冇9972咁大，殺傷力亦細好多。
國泰C輪9170：國泰（293）晏晝派半年成績表，市場唔收貨，股價跌65仙，啲C輪散晒。9170係各輪中最啱望多幾眼者，收13.9仙，散31%。年底到期，溢價4%，槓桿率9.6倍（有效5.9倍），引伸波幅34%。
章盛