恒基賣西灣河嘉亨灣落足本，宣傳費用龐大唔在講，經過上周售樓處混亂之後，呢個星期日再做內購，搵過另一個場地，選灣仔君悅酒店GrandBallroom，等買家舒服啲。恒基自己有酒店，今次專登租人哋嘅場地，畀錢其他人賺。
恒基林達民就話，君悅酒店場地過萬呎，足夠容納逾三千人。使費唔少，保守估計要七八十萬。
佢解釋，移師陣地，主要因為原售樓處地方唔夠用，如果太多買家到場會唔方便，其次因為天氣炎熱，揀個室內大場地，到場人士個個可以舒舒服服。
上次賣樓，包起蘇豪東多間食肆，今次改去酒店，招呼更加唔會失禮。發展商重話，預備大把美食招呼，一定唔會待慢。
九成半按揭大行其道，不過，信和噚日公布，同滙豐合作，為四個樓盤提供嘅按揭，居然重係九成。
一問之下，信和韓家輝解釋，九成半按揭貸款額上限得五百萬，而佢哋四個盤，大角嘴維港灣、柏景灣、帝柏海灣同小西灣藍灣半島，剩番大單位為主，最平都成五六百萬，多數單位用唔到九成半按揭，所以九成先至最實際。
今次同滙豐合作，提供首年定息0.18厘，其後全期P減2.75厘，另外重有0.18%貸款額現金回贈，又送律師費，同埋相等於貸款額一半嘅信用卡積分。
優惠適用於月底前入市，九月底前提取貸款。
韓家輝話，藍灣重有二百個單位，全部過千呎，呎價由四千至七千，大角嘴奧運站三寶就有百伙，八百幾至千幾呎，呎價四千至六千八。
東涌映灣園，長實以往開賣第一二期時，都提供全屋家具裝修套餐，今次第三期悅濤軒唔例外，同樣有全屋家具套餐，半價可以買到全屋家具，兩房六萬五，三房八萬六，四房九萬七。投資者有咗呢類家具套餐，要將單位出租，都比較容易。
長實郭子威話，有兩個投資者，噚日分別用二千五萬買入悅濤軒兩層，共十六伙，呎價三千三。
同系九龍塘畢架山一號，十九座一樓地下連花園，千九呎，最終以每呎逾萬一售出，總額逾二千一萬。
優質建築大獎2004選出最後八強，新鴻基地產有三項物業入選，似乎贏面頗大。
蘭西向籌委會打探結果，負責人回應話，評審標準包括物業品質、整體合作性、設計、創新、成本效益、環保及可持續性、安全、健康及衞生、項目管理、社會意識及顧客滿意度等。
02年首次選舉，由志蓮淨苑奪得大獎，今次花落誰家，要留待八月二十七日晚揭曉。
名牌連鎖店搶舖成風，美記盧展豪話，ArmaniExchange以每月九十萬，租用尖沙嘴廣東道五十四A至六十六號地下E、F、G舖，逾二千六呎，每呎逾三百四，比舊租客佐丹奴及影音等合共畀四十八萬，高近九成。
ArmaniExchange以前租開嘅新港中心舖，租金只係五十萬，周生生肯出價九十八萬承租，ArmaniExchange惟有退位讓賢。
自由行不斷帶旺核心區消費，名店搶貴舖呢種音樂椅遊戲，看來仍可玩多一段時間。
蘭西
電郵地址：
