法庭判廉署敗訴，話搜查報館搜集證據，沒有注重到新聞自由，尤其係冇參考呢方面英國嘅案例。
呢句真知灼見，真係幾新鮮。香港經已係中國管轄嘅領土，判案點解要參考英國案例？唔通重係英國殖民地？法官夏正民呢一招好高章，判呢單案，既維護「新聞自由」，又開咗一個審判有關新聞言論自由嘅案件時必須參考英國案例嘅先例。
好嘢！香港以後成為一個有新聞自由、又有英國大量案例保障自由嘅司法獨立政治實體，香港有救嘞！董建華叫啲傳媒循司法尋回公道，又的確好高瞻遠矚！
法官夏正民咁識得「雙贏」，原來佢唔簡單，佢亦做過記者，因此可以喺新聞自由同法治之間，取得一個另類嘅平衡。以後但凡有新聞言論自由受到侵犯，法官夏正民嘅案例，就成為日後嘅指引，亦即香港人享有英國案例保護嘅自由，所以夏正民嘅判詞，為香港「高度自治」重新定咗位，為「一國兩制」提供咗有力保障。
同時夏正民亦好照顧廉署面子，維護廉署獨立，又話廉署當初搜查雖然有問題，不過暫時毋須交出搜獲嘅報館文件，咁就容許咗廉署有上訴空間，話唔定去到終審庭，大法官又引述另外一啲英國案例，話維持社會廉潔公正，係更加重要啲都唔定。
八方身為新聞工作者，梗係認為新聞自由大晒。好彩23條冇通過，否則不堪設想。聽講中方有意在九月後將23條再隊上立法會，23條亦容許警務處副處長簽手令搜查報館家宅，將來如何再次立法，必須照夏正民大法官嘅講話精神嚟辦事，即23條唔可以凌駕於新聞自由之上，知道未！
遭廉署搜查嘅七間報館，到時亦唔好失憶，評論23條，記得睇吓自己嘅遭遇，持有雙重標準，香港人嘅眼睛係雪亮嘅，大家亦記住呢一日夏正民嘅指引性金句。
傳真︰2623-9278
電郵︰