聯儲局第2次加息，美股大幅反彈，港股卻反其道而行。噚日早段，期指只高開幾十點，已覺得唔係幾妥，果然行情跟住就反覆造落，大戶明顯係唔想個市起。
恒指低收12343，跌64點，尚算守穩在10日線（12344）水平，短期大市在窄幅內整固，要等大戶震倉同收集完成，先有機會破位而上，但呢段時間唔知要等幾耐？
窄幅上落，上阻力係12500，破位上就起碼見12800至13200；至於下支持係幾多？初步估計大戶唔會插得太深，相信50日線，即係12200水平，已可以守得住。國企個勢突然間轉曳，再跌落去，國指有機會見3850；早輪基金同大行大手咁買國企，引來唔少散戶跟風，呢個跌浪，唔排除有震倉成份，睇情形佢哋可能要部署在低位收集多一次，先會造上去。
噚日國指低收4048，大跌105點，估計拋售會持續多兩三日，下禮拜可以兜貨。
寶威控股（024）中期業績理想，股價逆流而上，收0.42元，升1仙。今年5月中大市急跌之時，寶威曾低見0.275元，現時雖由低位大幅反彈，但由於公司經營條件已大有改善，前景看好，現水平仍可吸納，作中長線持有。
04年度（12月年結）的上半年，寶威營業額21.2億元，減9.37%，盈利4475萬元，大升116%，扭轉對上年度下半年虧蝕之勢，每股盈利4.24仙。期內，出售投資物業，獲利1763萬元。
寶威主要經營鋼鐵貿易、加工製造同房地產開發。期內，表現最突出係加工業務，營業額2.47億元，升95.9%，經營溢利2407萬元，大升2.8倍。集團已計劃大力發展加工業務，在長江三角洲興建另一間針對IT、家電和汽車行業的鋼卷加工工廠，以擴大市場份額，新廠預期明年初可投入營運，成為集團未來新的盈利增長點。
現年度，寶威盈利估計約8000萬元，每股盈利7.6仙；05年度，長三角新加工廠投產，保守計盈利可上升至1億元，每股盈利9.5仙，預測PE7倍，1年為期，股價有機會見0.66元，預期升幅逾50%。
郭兆誠